Танымал журналист, медиаменеджер Батыр Қазыбаев туралы «Остаться светом» кітабы жарыққа шықты, деп хабарлайды 24KZ. Жаңа жинаққа Батырдың туыстары, достары мен әріптестері асыл азаматтың адами қасиеттері, кәсібилігі туралы айтқан естеліктері енген. Кітапта Батырдың өзі түсірген сирек суреттер де бар. Басылым сонысымен де құнды.

Көрнекті журналист, жазушы Кәкімбек Қазыбаев пен белгілі ұстаз Орынша Қарабалина-Қазыбаеваның шаңырағында дүниеге келген Батыр әке жолын қуып, отандық журналистика саласында елеулі жетістікке қол жеткізді. 2017 жылы «Қазақстан Медиа Альянсы» құрылтайшыларының бірі әрі басқарма мүшесі болды. Ол негізін қалаған телеарна, радиостанциялар, интернет-жобалар әлі күнге дейін табысты жұмыс істеп тұр. Танымал журналист Батыр Қазыбаев 2022 жылы дүниеден өтті.

Сұңқар Қарабалин, Батыр Қазыбаевтың туысы:

- Батыр қайтқаннан кейін бір жылдан кейін асы өтті. «Страница памяти Батыра Казыбаева» деп Facebook-те парақша аштық. Сол парақшаға Батырдың жолдастары, сыныптастары, әріптестері, туыстары мақала, естеліктер жаза бастады. Осы кітапты оқыған адам Батырдың қандай болғанын, қандай дәрежеге жетті, қандай дәрежеге жеткізді, қандай жобалардың басында болды – соның бәрін аудиторияға жеткізу үшін осы кітапты бастырдық.