Алматы облысындағы Қарқара жайлауында «Қымызмұрындық – 2025» іс-шарасы мен « Жолан жүйрігі» республикалық ат бәйгесі аяқталды.

Оған биыл он мемлекет пен еліміздің түкпір-түкпірінен келген он мыңнан астам көрермен қатысты. Осылайша бір кездері қанды Қарқара атанған тарихи мекеннің төсі тұлпарлар шауып, балуандар белдескен дүбірлі тойға айналды.

Көктем шығып, жер аяғы кеңіген шақта қымызмұрындық беру атадан балаға мирас болып келе жатқан дәстүрлі мерекеміз. Алматы облысында ұлттық құндылықтарды ұлықтауға арналған осынау іс-шара Қарқара мен Шәлкөде жайлауында кезек ұйымдастырылып келеді. Бір айта кетерлігі, қымызмұрындықтың географиялық ауқымы жылдан жылға кеңеюде. Былтыр оған Алатаудың арғы баурайындағы айыр қалпақты ағайындар қатысса, биыл он мемлекеттен мейман келді.

Жанарбек Әшімжан, ҚР Парламенті Мәжілісінің депутаты:

- Сол алғаш ұйымдастырылған сәттен бастап біз куә болып келе жатырмыз. Бұл енді тек қана өзіміздің ауданның халқы үшін ғана емес, республика үшін, бір жағы туризм бағытында, бір жағы дәстүр-салтымызды ұлықтау бағытында, бір жағы шетелдіктерге де үлкен бір стимул болатын, келіп арнайы қарайтын үлкен бір шара болады ғой деп ойлаймыз.

Жас шабандоздар мен аузымен құс тістеген 150 тұлпар «Жолан жүйрігі» республикалық ат бәйгесінің көрігін қыздырды. 31 шақырымдық аламанда Жамбыл облысының Қордай ауданынан келген Айдар Нұрмұхамбетовтің Айбалта атты сәйгүлігі алдына қара салмады. Ол бірінші орынға тігілген темір тұлпарға ие болды. 18 шақырымдық топ бәйгенің бас жүлдесіне тігілген екінші темір тұлпарды Қалқаман атты жүйрігімен Алматы облысы Талғар ауданының атбегісі Мағауия Қазбеков ұтып алды. «Толағай» алыптар сайысында Арыс қаласының тумасы Азамат Мақұлбековтың бағы жанды.

БЛИЦ: Қымызмұрындық бізде енді қазақтың барлық салт-дәстүрлері көрсетіледі ғой. Осы жылы шетелдерден де келіп жатыр. Қырғызстаннан тағы да басқа мемлекеттерден келіп, қатысып жатыр.

БЛИЦ: Жоғалған салт-санамызды, әдет-ғұрпымызды қайтадан елмен қауыштырып жатқан осындай шаралар көп болсын! Осындай мәдени мұралар көп болсын!

Аталған мәдени-көпшілік іс-шараға ақпараттық қолдау көрсетуге келген бұқаралық ақпарат құралдары өкілдерін Кереге таулы Кеген өңірінде ұйымдастырылған қымызмұрындықтың бюджеті қызықтырды.

Нұрбақыт Теңізбаев, Кеген ауданының әкімі:

- Әр аудандағы аудан басшыларының ұйымдастыруымен аудандағы, облыстағы өтіп жатқан мерекелік іс-шара болғаннан кейін олардың қолдаулары. Өздерінің демеушіліктерімен келіп, қазақ үйлерін тігіп, қонақтарын күтіп, ұлттық құндылықтарды насихаттап, көрмелерін қойып беріп жатыр. Бұлардың барлығына арнайы ешқандай қаражат бөлінбеген. Көбінесе осы жердегі тұрғылықты халықтың қонақжайлылығымен көрініп тұр деп айтуға болады.

Қымыз қазақтың ұлттық иммунитетіне баланған сусын. Оның қырық түрлі атауы бар. Құрамы адам ағзасына пайдалы дәрумендерге өте бай. Мерекені өткізуге атсалысқан өңірдегі шаруашылықтар жастарға қымызды қалай баптау керектігін түсіндірді. Қарқара жайлауына жиналған қауым ұлттық тағамнан тегін дәм татып, әсем табиғат аясында тынығып, ерекше әсерге бөленіп қайтты.

Ардақ Айбарұлы, Аят Дүйсембаев, Аманжол Жөңкешов