Желілік маркетингке оңай ақша үшін алданған халықтың қарасы көп.

Айжарық Ерали есімді Facebook қолданушысы «Сетевойдағы сергелдең» деген тақырыппен 3 түрлі желілік маркетингте жұмыс істеп көрген қыздың әңгімесін бөлісті. Түпкі авторы белгісіз, бірақ, сол салада «көпті көрген» адам болуы мүмкін. Ой салар деген мақсатта Caravan.kz медиа порталы орфографиясы мен тыныс белгілерін түзеп, қысқартып жариялады.

Сөзбе-сөз:

«Мен осыдан 5 жыл бұрын, үйде тыныш отырған жерімнен «сетевой» әлеміне келдім. Көп әйелдер «бай боламыз, қыруар ақша келіп жатыр, ақшаның астында қаласың!» дегенге қызықтым. Үстеріне киген әдемі киімі, жүріс-тұрысы, алдындағы тамағы-бәріне қызықтым.

Қазір ойласам, өзім сол кезде балабақшада тәрбиеші едім. Айлығым 70-80 мың теңге болатын, бірақ өте берекелі еді. Соны аз көріп, шүкірім азайып, жылтыр ақшаға қарай ойым кетті. Сетевойдың қыр-сырын мен секілді ешкім шаға алмайтын. Бірден қағып алатын қабілет болды.

Желілік маркетингтің көпшілік білмейтін сыры бар, бірақ оны ашық айтпайды. Айтайын:

— Сетевойдағы дүниенің бәрі дүкенде тұр, тіпті базарда 3-4 есе арзан.

— Ай жабатын кезде жанталас басталады — ПВ, балл санап, соңғы қалтаң қағылғанша балл ұру үшін елден ақша сұрап, қарызға батып, айды жабасың. Бұл-шындық! Келесі айда орнына қоямын дегенмен, сонша балл үшін алатын ақшаң-көк тиын.

— Сетевойда қарапайым халық ешқашан көтерілмейді. Тек ақша салғанда ғана үлкен статустар жабылады. Содан «жаптым» деп өтірік айтуға дейін барасың. Ақша салғаныңды айтпайсың, халықты шошытып алмауың керек. Үйде отырған қарапайым әйел «міне, миллионға шықтым» дейді. Негізінде, ақша салып, соны айналдырып жүр.

— Қазақстанға сетевой неге бірінші келеді? Себебі, бізді алдау оңай. Ақша көрсек, жолдан таятын рухани әлсіз екенімізді біледі. «Үкімет аз айлық береді» деп, біздің жанды жерімізді табады.

— Көп адам ПВ, балл қуалап, салған ақшасын шығару үшін жүгіреді.

— Ай сайын план беріледі. Оны орындамасаң- бітті, елге қарауға бет жоқ. Соңы- невроз.

— Көбі өнімді өзі ішпейді, «күшті, күшті» деп сата береді. Ішпесе де, «іштім» деп өтірік айтып, елді сендіресің.

— «Үйде отырған ана 1-2 сағат қана көңіл бөлсе, жеткілікті» дейді. Жоқ, олай емес. Бала шетте қалады. Елді көндіру үшін жарнама жасап, әлек боласың.

— Қолына телефон ұстаған ананың бала-шағасы, күйеуі шетте қалады. «Күйеуіме дәлелдеймін» деген әйелде принцип болады, соңы — психологияның бұзылуына әкеледі.

— Тағы айтамын, сетевойда адам ақша салмай, ешқашан өспейді! Қыздар, алданбаңдар!

— Тыныш отырған жерімнен қазір қарызым 3 миллион теңгеге жетті. Бұл — шүкіршілігімнің жоқтығынан, өз қателігім. Іштей тынып, қазір ес жидым.

— Көп қыздар кредит алып, тауар алады. Онсыз ешқандай квалификация жабылмайды. «Олай жүре бермейін» деп, қарызға кіресің. Мен де солай қарызға кірдім.

— Маркетингті түсіну оңай емес. Бергі майлы жағын-үй, көлік дейді. Ар жағында әрбір ПВ-ны есептегенде, қаншама минус екенін көбі түсінбейді.

— Машина қорғайтын статус бар-мыс. Ол машина салонда — 5 миллион. Ақшаға жинап, ала беруге болады. Бірақ сол машинаны алу үшін кем дегенде 3-6 ай статус ұстап тұру керек. Ай сайынғы тауар айналымы — 20 миллион теңге. Соңында айлық — 500 мың. Ол да- қарыздан тапқан табыс. Компания сіздің арқаңызда тауарын сатып жатыр.

«Нөлден бизнес» деген жоқ. Нөлден бизнес-үйде отырып «пирожки» пісіру, ауылдың құртын, майын сату. Ал шетелдік желілік маркетингке ақша салмай, өсу мүмкін емес. Үйде отырып, «ақша табамын» деп жүріп, өз қалтамыздан қалай ақша салып қойғанымызды білмей қаламыз.