Мемлекеттік наградалар металлургтер күнінде Шығыс Қазақстан облысының ардагерлері мен өнеркәсіп кәсіпорындарының үздік қызметкерлеріне табысталды.

Өңір – республиканың металлургия орталықтарының бірі болып саналады. Бүгінде шығыста өңделмеген мырыш пен тазартылған күміс өндірісі шоғырланған. Саланың технологиялары да жетілдірілуде. Металды балқыту процесі автоматтандырылған, бірақ барлық күрделі өндірістердің басында әрқашан адамдар тұрады.

Мемлекеттік наградалар «Құрмет», «Еңбек Даңқы» және «Ерен еңбегі үшін» ордендері өз иелерін тапты. Шығыс Қазақстан облысының әкімі Нұрымбет Сақтағанов сала өкілдерін арнайы құттықтады. Президент жұмысшы мамандықтар жылы деп жариялағалы еңбек адамдарының мәртебесі артты. Өңір басшысы өз сөзінде металлург отандық экономика үшін ең құрметті және маңызды мамандықтардың бірі екенін ерекше атап өтті. Марапат алғандардың қатарында Мыс зауытының балқытушысы Казез Бекшентаев те бар. Ол өндірісте қырық жылдан астам еңбек етіп келеді. Кәсіби мерекеде алған орденін жұмысшылар әулетіне көрсетілген құрмет деп бағалады.

Қазез Бекшентаев, «КазЦинк» ЖШС мыс зауытының балқытушысы:

- Бұл орденді мен Ұлы Отан соғысының қатысушысы болған атам Бекшинтаев Нұрсалимге арнағым келеді, Кеңес одағы кезінде ол тракторшы болған.

Бүгінде тек "Казцинк" компаниясында отыз мыңға жуық жұмысшы еңбек етеді. Жалпы қазақстандық металлургтер кәсіби тұрғыдан өте білікті саналады. Отандық тәжірибеге тіпті Австралия мамандары қызығушылық танытып отыр.

Андрей Лазарев, "Казцинк" ЖШС әкімшілік мәселелер жөніндегі басқарушы директоры:

- Біздің инженерлер өте білімді, компьютерлермен жұмыс істейтін машиналарды басқарады. Мұнда адам қолымен жасалатын жұмыстың үлесі азайып келеді, "Казцинк" жабдықтары үнемі жаңартылып отырады.

Қазіргі металлургтер – жан-жақты мамандар. Олар Шығыс Қазақстанда атом реакторлары үшін бірегей жабдықтарды әзірлеп, әлемдік авиация жасау үшін титан балқытады. Қазақстандық металлургтердің құрметіне облыстың қалалары мен аудандарында концерттік бағдарламалар ұйымдастырылды.

Достық Талғатұлы, Дмитрий Пыхтин