«Қазсушар» мекемесінің оңтүстік аймақтағы бөлімше басшылары қатаң сөгіс алды.

Ресми дерекке сүйенсек, олар ылғалды көп қажет ететін дақылдарды артығымен егіп, суды заңсыз пайдаланған. Мәселен, Түркістан облысында күріш жоспарда көрсетілген мөлшерден 5 есе артық егілген. Су тапшылығына қарамастан, мемлекеттік кәсіпорын қызметкерлері жүздеген шаруа қожалықтарымен суару жөнінде келісімшарт жасасқан. Ал Қызылорда облысында мамандар су ресурстарының тиімді жұмсалуын қадағаламаған. Жергілікті диқандар 5 мың гектарға жуық күріш алқабын суарып, 50 миллион текше метрден астам суды заңсыз пайдаланғаны белгілі болды. Осыған байланысты филиал басшылары жауапқа тартылды. Биыл оңтүстік өңірлерде суару маусымы ерте басталды. Бұған ауа температурасының жоғары болуы мен жауын-шашынның аздығы себеп. Тиісінше қазір ауыл шаруашылығы қажеттілігіне оңтүстіктегі бес өңірде шамамен 7 миллиард текше метрге жуық су қажет.