Кітапхананың ашылу салтанатына қатысқан «Хабар Агенттігі» АҚ Басқарма төрағасы Кемелбек Ойшыбаев жерлестерінің қуанышын бөлісіп, Мәдениет және ақпарат министрі Аида Балаеваның құттықтауын жеткізді.

Тоқсан мың дана кітап қоры бар кітапхананың жаңа ғимаратын салуға облыс қазынасынан 431 миллион теңге қаралған. Мұндағы коворкинг орталықтар, оқу залдары цифрлық технологиялармен жабдықталған.

Айнұр Уәлиахметова, М.Есламғалиұлы атындағы аудандық кітапхана жүйесінің директоры:

- Ең басты ерекше тарихи күн біз үшін. Өте қуаныштымыз. Бұл жерде әсіресе кітапханаға келетін жастарға тек кітап оқу емес, олардың шығармашылықпен айналысып, зерттеу жұмыстарын жасауға, түрлі шаралар ұйымдастыруға барлық мүмкіндік қаралған. Бұл жерде электронды кітапхананың сандық жүйесіне қол жеткізуге мүмкіндік жасалған, медиа залдар бар.

Сондай-ақ осы күні кітапхананың екінші қабатында танымал қаламгер Бақтығұл Ойшыбаев атындағы оқу залы ашылды. «Жазушы бар күш-жігер, қажыр-қайратын Сырым ауданының дамуына жұмсады, өз шығармаларында қарапайым еңбек адамдарының мінез-бітімін шынайы сомдап, ауылдың тыныс-тіршілігін көркем оймен кестелеп кетті», дейді замандастары. Тіке сөйлеп, турасын айтқан, қашан да әділдік туын көтерген азаматтың көзі тірісінде «Алыстан көрінген от», «Қимас күндер» жинақтары жарық көрсе, 2010 жылы ұрпақтарының құрастыруымен «Өмір белестері» кітабы басылып шыққан.

Манира Ойшыбаева, жазушының жары:

- Өзінің жұмысын таң атқанша жасайтын. Таңғы 5-те келетін газет әбден шыққасын, қол қойып тексеріп. Ұрпағын ол шындыққа тәрбиелейтін, әр уақытта дұрыстыққа тәрбиелейтін. Білімді бол, білімді болмасаң сен ешқашан биік шыңға жете алмайсың деп айтатын.

Махмет Қажиахметов, журналистика ардагері:

- Әскерден келіп, ағайдың шақыруымен мен де осы жұмысқа кірісіп, бірге жұмыс жасадым. Онда көзіммен көргенім ол кісіні, нағыз маман. Көп нәрсені бізге үйретті, әрбір жанрда мақала жазуды, жаза білуді. Газеттің барлық жауапкершілігін қасымызда жүріп үйретті, бағыттады. Соның ішінде өзі журналистикамен жазушылықты қатар меңгеріп, тең ұстаған адам.

Сапарға шыққанда өзінің болашақ кейіпкерлерін сөйлетіп ала келеді. Сондай керемет жақсы адам болды, сондай жазушы болды.

Кітапхана – білім ордасы. Жымпиты ауылында ашылған жаңа кітапхана аудан руханиятына қалтқысыз қызмет етпек.

Е. Жылқайдарұлы, Б. Жарылғасов, Қ. Ақрап