Игі істің негізгі бастауы ізгілік пен қайырымдылыққа толы наурыз айы. Сүрінгенге сүйеу, қиналғанға демеу болған қазаққа ежелден асарлату, жылу жинау деген атпен таныс. Халқымыздың бірлігін бекемдеп тұрған мәдени дәстүр бүгінде волонтёрлік қызметпен жалғасып жатыр.

Қайырымдылық – қазақтың қанында бар қасиет. Ежелден жоқ-жітікке қарасып, жылағанды жұбатып келген елміз. Тіпті тұтас ауыл халқы көмекке мұқтаж адамға асарлатып, үйін салып беретін.

Марат Әбсемет, тарих ғылымдарының докторы:

- Ел жылу жинап, халық көмектесетін. Жылу жинау кезінде, мысалы, 20-30 жылдары аштық болды ғой өткен ғасырда. Сол кезде Алашорда қайраткерлері Міржақып Дулатұлы, Жүсіпбек Аймауыт халықтан жылу жинап, халыққа таратқан, көмек жасаған. Асарлатып, талай үйлер салынды, біраз ақша жиналды. Талай қайырымдылық шаралары өтті. Сол ертеден келе жатқан нәрсе біздің ел болып, қазақ болып, ұлт болып қалыстауымызға сол нәрсе қатты көмектесті.

Қайырымдылықтың үлкен-кішісі болмайды. Құны ақшамен де өлшенбейді. Қазіргі «Тәлімгерлер» жобасы соған дәлел. Заң бойынша 25 жастан асқан кез келген қазақстандық азамат балалар үйіндегі бір жасөспірімге көңіл бөліп, дамуына көмектесе алады.

Бекназар Қазиев, «Тәлімгерлер» бағдарламасының өкілі:

- «Тәлімгерлер» бағдарламасы 2014 жылдан бері Қазақстанның 17 қаласында ұйымдастырылады. Ең басты мақсаты – балалар үйінде тұратын жасөспірімдерге тәлімгер табу. Оның басты мақсаты – отбасы таба алмайтын балаларға кем дегенде дос табу, дербес өмірге дайындау. Балалар үйінен шыққан кезде жалғыз қалмай, қасында адам болатын жағдай жасау. Екінші әлеуметтендіру. Пайдалы, керек дағлыларды қалыптастыру.

Бүгінде аталмыш бағдарлама арқылы елде 350-ден астам ерікті «тәлімгер» атанған. Соның 83-і Астанада. Мысалы, Айнұр мен Ангелина осы жоба арқылы бір-бірін тауып, 7 жылдан бері жақын сырласқа айналған.

Айнұр Әуесханова, тәлімгер:

- Қазір бір-бірімізге түрлі тақырыпта әңгіме айтатын деңгейге жеттік. Кішкентайында қатты ұяң, ұялшақ болатын. Мен өзімді Ангелинаға ұстаз немесе үлкен адам емес, сырлас досы ретінде қабылдатуға тырыстым. Оған үнемі уақыт бөліп, қамқорлық таныттым. Ол болашақта модель немесе фитнес жаттықтырушы болғысы келеді. Ендігі мақсатым – оны сол бағытқа дайындап, болашағына жол ашу. Осы сәтті пайдалана отырып, өзге адамдарды осындай балаларға қайырымдылық танытып, қолдауға шақырамын.

Ангелина, балалар үйінің тәрбиеленушісі:

- Мен өз күшіммен телефон алуды армандадым. Мұны естіген Айнұр маған жұмыс табуға көмектесті. Жаз бойы қызмет етіп, ойлағаным жүзеге асты. Білесіз бе? Мен кішкентайымда Айнұрмен қоғамдық орындарға тамақтануға барғанда қарапайым түбіртекті көрсетіп, тапсырысымызды алуға қорқатынмын. Тәлімгерім сол қорқынышымды жеңуге көмектесіп, өзіме деген сенімділігім арттырды. Шіркін, әлемде Айнұр секілді адамгершілігі мол, қайырымды жандар көп болса екен.

Қазір елде ресми тіркелген мыңнан астам қайырымдылық ұйымы бар. Олар былтыр 7300-ге жуық игі іс өткізіп, оған 50 мыңдай адамды тартқан.

Авторлары: Мерей Қанапия, Мерей Талап, Қанат Махмұдов