Түркия кейінгі жылдары жел энергиясы саласын белсенді дамытып, жаңартылатын қуат көздерінің үлесін арттырып келеді , деп хабарлайды 24KZ. Осы арқылы түрік елі «жасыл» экономикаға серпін беріп, энергетикалық қауіпсіздікті барынша қамтамасыз етуге күш салмақ. Қазір ел желден қуат алу техологиясын дамытуға ден қойған.

Түркия жел энергетикасының қуаты бойынша Еуропадағы алдыңғы үштікке енді. «WindEurope» ассоциациясының мәліметі осындай. Германия жел станциялары арқылы 3,2 гигаватт электр қуатын өндіріп көш бастаса, Финляндия екінші, ал Түркия 1,3 ГВт энергия өндірумен үшінші орынға көтерілді.

Оғузхан Ақйенер, Түркия энергетикалық стратегиялар мен саясаттарды зерттеу орталығының басшысы:

- Түркия негізінен энергияны көптеп импорттайтын ел ретінде отандық, оның ішінде жаңартылатын энергия көздерін дамытуға ерекше назар аударады. Осы мақсатта көптеген шара қабылданды. Бірақ басты жетістіктер жаңартылатын энергия көздеріне бағытталған жұмыс нәтижесінде пайда болды. Бұл бір жағынан көміртегі шығарындыларын азайтуға көмектессе, екінші жағынан отандық энергия көздерін пайдалану біз үшін маңызды.

Түркияда алғашқы отандық жел энергиясы нысаны осыдан 25 жыл бұрын Измирде салынды. Қазірде елде тұтынылатын электр қуатының 11% желге тәуелді. 2024 жылы Түркиядағы электр энергиясы өндірісінің 35,2%-і көмірден, 18,9%-і табиғи газдан, 21,5%-і гидроэнергиядан, 10,5%-і жел энергиясынан, 7,5%-і күн энергиясынан, 3,2%-і геотермал энергиядан және 3,2%-і басқа көздерден алынған.

Оғузхан Ақйенер, Түркия энергетикалық стратегиялар мен саясаттарды зерттеу орталығының басшысы:

- Түркия жел энергиясы саласында 25 жылда үлкен жетістіктерге жетті. Елдің энергия тапшылығын азайту мақсатында жаңартылатын энергия көздеріне, соның ішінде жел және күн энергиясына ерекше көңіл бөлінді. Бұл бағыттағы дамуға мемлекеттік реттеу, субсидия мен ішкі өндірісті ынталандыру шаралары ықпал етті. Қазір Түркияда жел энергиясының қуаты 11 ГВт-қа жетті және 2035 жылға қарай бұл көрсеткішті 30 ГВт-қа жеткізу жоспарланған.

Түркия 2035 жылға дейін 30 ГВт қуатты жел электр станциялары арақылы алуды көздейді. Айта кеткен жөн, бұл елде электр энергиясын өндірумен айналысатын 35 мыңдай станция бар. Олардың басым бөлігін жеке сектор қаржыландырады. Ал мемлекет саланы реттеп, бағыт-бағдар көрсетеді.

Авторы: Меруерт Қанағат