Келесі жылы Жаңаөзенде спорттық-сауықтыру кешені қолданысқа беріледі, деп хабарлайды 24kz.

Бір қабатты нысан 4 гектар аумақта орналасады. Заманауи үлгідегі ғимарат құрылысын 9 айда бітіру жоспарланған. Ауқымды жобаға елдегі ірі қайырымдылық ұйымдардың бірі Halyk қоры 1,5 млрд теңге бөлді.

Спорттық сауықтыру кешенінің қазығы Жаңаөзеннің Кендірлі ауылында қағылды. Халқы тығыз қоныстанған, жастардың үлесі жоғары қалаға мұндай нысан аса қажет. Ғимарат үйірмелерден бөлек бокс, дзюдо секілді халықаралық олимпиадаға спортшылар дайындалатын көпбейінді жаттығу залдарымен жабдықталады. Нысан ашылған соң жұмыс орындары құрылады.

Жансейіт Қайнарбаев, Жаңаөзен қаласының әкімі:

- Рахат ауылы, Кендірлі ауылы және осы Теңге ауылы, Жаңаөзен қаласының орталығында тұрғанын есептеп, осы локацияны таңдадық. Салауатты өмір салтын қалыптастыруға осы орталық өз септігін тигізеді дейтін сеніміміз бар. Нalyk қайырымдылық қорына қала әкімдігінің атынан үлкен рахметімізді айтамыз.

2023 жылы аймақ әкімдігі мен Halyk қоры арасында меморандумға қол қойылғаны мәлім. Қордан бөлінген 5 млрд теңге Маңғыстауда әлеуметтік жобаларды жүзеге асыруға жұмсалып жатыр. Мәселен, Жаңаөзенде балалар мен ересектерге арналған 50-ге жуық ойын және спорт алаңы салынды.

Сағынбек Шүңкеев, Halyk қорының директоры:

- Енді мінекей, біз келесі сатыға келдік, яғни, Тимур Құлыбаевтың Halyk қоры үшін бұл – бірінші жоба. Дене шынықтыру-сауықтыру кешенін бірінші рет слаып келеміз. Оны біз Жаңаөзен қаласында бүгін бастап отырмыз. Құдай қаласа, келесі жылы Көрісу күніне бітіреміз, есігін ашамыз деп отырмыз.

Биыл наурызда Бейнеу астық терминалы алғашқы өнімін шығарды. Кәсіпорынды қайта іске қосуға Halyk қоры 1,8 млрд теңге жұмсады. Бұл – өңірде азық-түлік қауіпсіздігін қамтамасыз етудегі стратегиялық маңызды жоба. Сондай-ақ қор қаражатына Жаңаөзенде, Сайын Шапағатов ауылында тұщыту қондырғысы іске қосылды. Соның нәтижесінде 25 мыңнан астам тұрғын таза су ішуге мүмкіндік алды.

Авторлары: Талғат Исламұлы, Ренат Досалиев