Қазақстанға Чехия мен Мажарстаннан керқұландардың жаңа бір тобы әкелінді .

8 асыл тұқымды жануар тиелген әскери ұшақ Арқалық қаласына қонды. Әрі қарай жабайы жылқылар "Алтын дала" мемлекеттік табиғи қорығына жеткізілді. Әзірге оларды мамандар кең қашаларда ұстап, жыл бойы бақылайды. Бейімделген соң табиғи ортаға жіберіледі. Сирек кездесетін тұяқтыларды тасымалдау "Жабайы жылқылардың қайта оралуы" халықаралық жобасы аясында екінші рет жүзеге асырылып отыр. Бастама елімізде жойылып кеткен керқұландар тұқымын тарихи мекенінде қайта қалпына келтіруді көздейді. Былтыр маусым айында жеткізілген 7 жылқы Торғай даласына бейімделіп, кейін жабайы табиғатқа жіберілді. Алдағы 4 жылда елімізге 50-ге жуық керқұлан жеткізіп, олардың популяциясын кеңейту көзделіп отыр.