Жетісу облысы әлеуметтік-экономикалық даму көрсеткіші жөнінен елдегі үздік үш өңірдің қатарына енді, деп хабарлайды 24kz.

Мемлекет басшысының Жарлығымен үш жыл бұрын қайта құрылған облысқа 1 трлн 200 млрд теңге инвестиция тартылып, 3,5 мың жаңа жұмыс орны ашылған.

Бақыт Топтаева, тілші:

- 2022-2024 жылдары Жетісу облысында құны 135 млрд теңгеден асатын 135 жоба жүзеге асқан. Арнайы экономикалық аймақтары мен шекарадағы кедендік өткізу пункттері облыстың экономикалық драйверіне айналып келеді. Бір ғана «Қорғас – шығыс қақпасы» аумағындағы кәсіпорындар 81 млрд 600 млн теңгенің өнімін өндіріп, қазынаға 9 млрд теңге көлемінде салық түсірген.

Ғалиасқар Сарыбаев, ҚР Парламенті Сенатының депутаты:

- Арнайы экономикалық аймақта бүгінгі күні 28 инвестициялық жоба іске асып, 113 млрд пайда әкелді. Оның сыртында мыңға жуық жұмыс орны ашылды. Бүгінгі күні сол аймақтарда қосымша 40 жоба іске асуда. Осының бәрі Жетісу облысының әлеуметтік-экономикалық әлеуетін арттырады деп ойлаймын.

Тоғыз жолдың торабында орналасқан өңірдің көлік-логистикалық әлеуеті зор. Мәселен, Алакөл автомобиль пункті тәулігіне 1600 көлікке дейін өткізеді. Сонымен қатар жылына 350 мың контейнер қабылдай алатын екі көпфункциялы жүк терминалы іске қосылған.

Серік Ақымбеков, Мемлекет және қоғам қайраткері:

- Әлеуметтік жағдайларға көп көңіл бөлініп келе жатыр. Мысалы тұрғын үй мәселесін алатын болсақ, Талдықорған қаласындағы кезекте тұрған мұқтаж адамдардың саны жыл сайын азайып келе жатыр. Ол бюджет есебінен салынған және инвесторлардың, спонсордардың есебінен кезекте тұрған мұқтаж адамдарға үй беру өсіп келе жатыр. Сонымен қатар әлеуметтік нысандар, мәдениет үйлері, спорт кешендері, ауыл ішінде облыс дәрежесінде жолдардың салынуы да қолға алынған.

Аграрлы аймақта ауыл шаруашылығы өнімдерінің 65%-і өңделеді. Оның ішінде қант қызылшасы, жүгері, бидай, соя, ет, сүт өнімдері бар. Әсіресе, тәтті түбір алқабы соңғы жылдары 3 есе ұлғайған. Былтыр 14 мың гектарға жуық алқаптан 731 мың тонна рекордтық өнім алынды. Мал басы 2,5 млн-нан асып, екі жылда жаңадан 70 ветеринарлық пункт салынды. Сондай-ақ 84 елді мекенге табиғи газ құбыры тартылған. Жеке облыс мәртебесіне ие болғанға дейін небәрі бес елді мекенге көгілдір отын кіргізілген еді.

Болат Керімбек, ҚР Парламенті Мәжілісінің депутаты:

- Тағы бір айтатын дүние, осы біздің тау туризмінің де қолға алынып жатқандығы қуантады. Мысалы жетісу Алатауының мүмкіндігі тау туризмін алдағы уақытта жаңаша дамуына ерекше қарқын береді деген ойдамын.

Алакөлге апаратын жолдың құрылысы бүгінде толық аяқталған. Үшарал әуежайының ұшып-қону алаңы да ұзартылып, Airbus, Boeing сынды ірі ұшақтарды қабылдауға жағдай жасалды. Үш жылда Алакөл жағасында 47 демалыс орны салынды. Нәтижесінде суға шомылу маусымында келушілер саны 2 млн-нан асты.

Авторы: Бақыт Топтаева