Жаңа Су кодексі күшіне енді. Демек су нысандарын қорғау күшейіп, су инспекторларының құзыреті артты, деп хабарлайды 24kz.

Кұжатта алдымен тіршілік нәрін бей-берекет пайдалануға жол бермеу жайы қарастырылған. Әсіресе, егін шаруашылығында. Енді су үнемдеу технологияларын кеңінен қолданған шаруаға мемлекет тиісті қолдау көрсетеді. Заңнамаға алғаш рет «су қауіпсіздігі» ұғымы енгізілді.

«Бұл елімізді су тапшылығы, су айдындарын ластау мен су көздерінің сарқылуының алдын алады», — дейді мамандар.Су нысандарын қорғау бойынша да талап күшейтілген. Жекенің қолына өтіп кеткен су қоймаларының иелері жағдайды түземесе, жауапқа тартылады. Сонда-ақ бұдан былай су айдындарын сақтау мен пайдалану туралы барлық ақпарат жыл сайын ашық дереккөзде жарияланады.

Еркебұлан Мәмбетов, ҚР Парламенті Мәжілісінің депутаты:

- Суды жай пайдаланамыз дегенбіз. Қазір Президентіміз қойған тапсырма: су ресурстарын үнемдеп ұстау. Қазақстан ғана емес, әлемде табиғат өзгерістері болып жатыр. Өңірлерге барамыз, сол кезде халыққа түсіндіріп, бәріміз де соған кірісуге тиіспіз.