Қарулы күштерде тәртіп пен қауіпсіздікті нығайту мақсатында "Әскердегі заң мен тәртіп" және "Цифрлық профилактика " атты жаңа 2 жоба іске қосылды.

Президенттің тапсырмасымен қолға алынған жоба аясында әскери бөлімдерде жасанды интеллект көмегімен жұмыс істейтін заманауи бейнебақылау жүйелері орнатылмақ. Сол арқылы сарбаздардың қызметі бақылауға алынады. Жобада тағы қандай жаңашылдық бар?

Бұл жобалар әскери тәртіпті сақтаумен қатар төтенше жағдайлардың алдын-алуға да көмектеседі. Бұл туралы Бас прокурор Берік Асылов Икс желісіндегі парақшасында жариялады. Оған сәйкес, далалық жаттығулар, жауынгерлік дайындық пен күзет қызметі кезінде командирлер мен сарбаздар бейнежетондармен қамтамасыз етіледі. Сондай-ақ армия.кз сайтында әскери қызметшілерге арналған цифрлық кеңесші де жуық арада іске қосылады. Қосымша байланыс арналары арқылы әр сарбаз оқыс жағдай болған жағдайда өз құқығын қорғау үшін тиісті мекемеге тікелей хабарласуға мүмкіндік алмақ.

Берік Асылов, ҚР Бас прокуроры:

- Ашықтықты қамтамасыз ету мақсатында әскерге шақыру және медициналық комиссия отырыстарының аудио-бейне жазбасын тіркеу мәселесі де қарастырылып жатыр. Бұл жазбалар негізінде хаттамаларды цифрландыру және әскерге шақырылушылар үшін оны қашықтан қолжетімді ету көзделген. Бұл денсаулығына байланысты қарсы көрсеткіштері бар азаматтардың мерзімді әскери қызметке шақырылуын болдырмау үшін жасалады.

Наурыз айынан маусым айының соңына дейін 18 бен 27 жас аралығындағы азаматтар әскер қатарына шақырылып жатыр. Елімізде жалпы 200-ге жуық қалалық және аудандық әскерге шақыру комиссиялары жұмыс істейді. Қазақстан Республикасы Қарулы Күштерінің Бас штабы бастығының орынбасары Сәкен Жүсіповтың айтуынша, 30 маусымға дейін 20 мыңнан аса қазақстандық әскери борышын өтеуге аттанады. Оның 10 мыңнан астамын Қарулы күштерге, 7 мыңнан аса азаматты Ұлттық гвардияға, 2 жарым мыңын Ұлттық қауіпсіздік комитетінің шекара қызметіне, 400-ге жуығын Төтенше жағдайлар министрлігінің құрамына, ал 300-ге тарта азаматты Мемлекеттік күзет қызметіне жіберу жоспарланып отыр.

195 қалалық және аудандық әскерге шақыру комиссиясы бар

20 мыңнан аса қазақстандық әскери борышын өтеуге аттанады

ҚР Қарулы күштерге – 10 598 азамат;

Ұлттық гвардияға – 7 054 азамат;

ҰҚК шекара қызметіне – 2 500 азамат;

ТЖМ – 391 азамат;

Мемлекеттік күзет қызметіне – 290 азамат.

ЦИТАТА:

Ерболат Саурықов, ҚР Парламенті Мәжілісінің депутаты

Әскерге жасанды интеллектіні енгізу, сарбаздарымызға бейнежетондар табыстау мәселесі қаралды. Бұл бүгінгі күнде АҚШ-та, Еуропа елдерінде іске асып жатқан бағдарлама. Қорғаныс жүйесінде жасанды интеллектіні қолдану үлкен нәтижесін беріп отыр. Сондықтан қылмыстық жағдайлардың алдын алу үшін мұны пайдаланған дұрыс деп санаймын. Ол үшін мемлекеттен қаражат бөлініп, қажетті мамандарды тарту керек.

Соңғы үш жылда Қазақстан әскерінде қандай оң өзгерістер орын алды? 2023 жылдан бастап мерзімді әскери қызметшілер үшін несие төлемдеріне қатысты демалыс қарастырылған. Бұл қызмет өткеру кезеңінде және запастағы қызметке шығарылғаннан кейін 60 күн ішінде қарыз төлемдерін уақытша тоқтата тұру мүмкіндігін береді. Сондай-ақ олар үшін бірқатар білім беру жеңілдіктері де енгізілді. Бұдан бөлек, дәл сол жылы ұшқыштар құрамының және әскери оқу орындары оқытушыларының жалақысы 60 пайызға артты. Ал былтыр офицерлік құрамның орташа табысы 20 пайызға, сержанттық және қатардағы құрамның табысы 33 пайызға ұлғайды.

2023 жылдан — Ұшқыштар құрамы, әскери оқытушылардың жалақысы — 60%

2024 жылдан — офицерлік құрамның орташа табысы — 20,3%

сержанттық және қатардағы құрамның табысы 33, 9%

Сонымен қатар Десанттық-шабуылдаушы әскерлер Құрлық әскерлері құрамынан шығарылып, жеке құрылым ретінде қызмет ететін болды.