«Орталық Азия – Қытай » ІІ іскерлік кеңесінде құны $17 млрд болатын 35 келісімге қол қойылды.

Астанада өткен кеңеске мыңға жуық адам қатысты. Олардың қатарында елімізбен қатар Қытай, Өзбекстан, Қырғызстан, Тәжікстан және Түрікменстан сауда-өнеркәсіп палаталарының басшылары мен бизнес қауымдастық өкілдері бар. Ауқымды шараны Қазақстанның Сыртқы сауда палатасы ұйымдастырған. Кеңес отырысында бірқатар келісімге қол қойылып, Инвестициялық жобалар таныстырылды. Оның ішінде Цифрлық инфрақұрылым, электрондық басқару, стартап-экожүйелер және трансшекаралық шешімдер салаларында бірлескен жобалар бар. "Кеңес Орталық Азия елдері мен Қытай арасындағы серіктестікті нығайта түседі дейді Премьер-министрдің орынбасары – ұлттық экономика министрі",- Серік Жұманғарин.

Серік Жұманғарин, ҚР Премьер-министрінің орынбасары – Ұлттық экономика министрі:

- Орталық Азия мен Қытай арасында сауда көлемі қарқынды дамып келеді. Былтыр алыс-беріс 95 млрд долларға жетті. Оның жартысы Қазақстанның еншісінде. Ал соның ішінде өткен жылы Қытай мен Қазақстан арасындағы тауар айналымы 44 млрд долларды құрады. Біз бұл көрсеткішті екі есе арттыруға ниеттіміз. Ол үшін барлық жағдай жасалған. Бұл бағыттағы электронды коммерцияның маңызы зор. Біз Қытай халық республикасы төрағасының бастамасымен «Жібек жолының электронды коммерциясы» пилоттық аймағын құруда ынтымақтастыққа дайын екенімізді растаймыз.