Солтүстік Қазақстан облысы Мамлютка қаласында «Таза бейсенбі» акциясы ұйымдастырылды, деп хабарлайды 24KZ. «AMANAT» партиясы ұйытқы болған шараға 500-ге жуық адам қатысты. Оның ішінде мемлекеттік қызметкерлер, түрлі ұйым жұмысшылары мен еріктілер бар. Жиналғандар орталық стадион аумағын ретке келтіріп, спорт жабдықтары мен орындықтарды сырлап шықты.

Жалпы жыл басынан бері облыс бойынша ұйымдастырылған сенбіліктердің арқасында қоқыс алаңдарына 25 мың тонна тұрмыстық қалдық шығарылды.

Серік Қанжығалин, Мамлют аудандық дене шынықтыру және спорт бөлімінің басшысы:

- Бүгін біз Мамлют ауданының орталық стадионында «Таза Қазақстан» экологиялық бағдарламасы аясында көптеген жұмыс жүргізіп жатырмыз. Жалпы аудан бойынша 1,5 мың тоннаға жуық қоқыс шығарылды. Трибуналарды сырлау, шөп шабу, ағаштарды кесу және тағы басқа жұмыстар атқарылып жатыр.