Біріккен араб әмірліктерінде ұшақ жолақысы қымбаттады.

Кей бағыттарда баға 60 пайызға дейін көтеріліп, Дубай мен Абу Даби арқылы сапар шеккен жолаушылардың қалтасына салмақ салды.

Туристік маусым соңында елге қайтпақ болған қазақстандықтар да осындай жағдайға тап болды. Тасымалдаушы компаниялар баға айырмашылыған Иран әуе кеңістігінің жабылуы себепті болған жағдай деп отыр.

Рауан Мыңбай, тілші:

- Араб елдері туристік тұрғыда аса танымал нарық. Баға жағынан тиімді ұсыныс көп. Әдетте шығанақтағы әмірліктен бастап, Қатар, Кувейт, Бахрейн сынды елдерге саяхатшылар ғана емес, транзиттік жолаушылар да аялдайды. Дегемнен қазір Израиль-Иран қақтығысы жағдайды күрт өзгертті. Әуе компаниялары Таяу Шығыста ұрыс қимылдары жүріп жатқан аумақты айналып ұшатын болды. Сәйкесінше жанармай және операциялық шығын артты. сол себепті қызмет құны 15-тен 60 пайызға дейін жоғарылады. Ал Абу Даби және Дубай арқылы бюджеттік компания ұшақтарымен сапар шегуді көздегендер жоспарын өзгертуіне тура келді. Айталық, Алматы, Түркістан, Баку, Ташкент, Самарқанд сынды бағыттарда тасымалдаушы тарап рейсті уақытылы орындай алмай, жұртшылықты жолынан қалдырды.

Никита Ким, жолаушы:

- Мен қазір Прагада білім алып жүрмін. Бірнеше күн демалысымды пайдаланып, Абу Даби арқылы елге қайтуды жоспарлаған едім. Алайда 3 күн уақытым текке кетті. Түркістанға алған билетімді қайта ауыстырып, оқуыма оралатын болдым. Жоспарым бұзылды.

Дегенмен, саяхат саласындағы компаниялар туристік ағын толықтай тоқтады дегенге келіспейді. Бұл бір жағынан маусымдық құбылыс дейді. Өйткені жылда жаз мезгілінде араб жеріне сапарлайтындар саны кемиді. Күн райы қолайсыз болғандықтан, көбі саяхат турын күзге жоспарлайды. Алдағы айларда ахуал оңала ма, жоқ па белгісіз. 13 маусымда басталған қақтығыстың қашан тоқтайтынын ешкім дөп басып айта да алмайды. Сондықтан Таяу Шығыс елдеріне сапарлаудың тәуекелі басым болып тұр.

Фараһ Абдулхамед, саяхат саласы бойынша кеңесші:

- Негізі қазір араб жерінде демалыс маусымы толық аяқталды. Бұл уақытта әмірлік тұрғындарының өзі сырт елдерге сапарлағанды жөн санайды. Мен өз отандастарыма Қазақстанға барыңыздар дер едім. Таяу Шығыста ахуал тұрақталғанша бұл ең ұтымды шешім болады. Басқа да туристік аймақтарды зерделеп көру керек.

Бір айта кетерлігі, Араб түбегі мен Орталық Азия және Оңтүстік Кавказ арасындағы әуе рейстері қайта қалпына келгенімен ұшақтар дәлме-дәл уақытында ұшып жатқан жоқ. Бастысы жолаушылар дін аман. Діттеген жерге кешігіп болса да жетіп жатыр. Атап өткен жөн, Таяу Шығысқа келетін еуропалық саяхатшылар қарасы да қалың емес. Көбі қақтығыстың аяқталғанын және бағаның тұрақталған сәтін күтіп отыр.

Рауан Мыңбай