Алматылық колледж студенттеріне жазғы практика кезінде тамаққа ақша орнына азық-түлік беріледі, деп хабарлайды 24kz.

Бұл – қаладағы жұмысшы мамандықтарында білім алып жатқан колледж студенттері арасындағы мониторинг нәтижесі. Өндірістік тәжірибе кезінде олар ыстық тамаққа ақшалай өтемақы алуы тиіс. Бірақ ата-аналар: «Жастар бұл қаржыны тамақтан басқаға жаратуы мүмкін», -деп алаңдаушылық білдірген. Мәселенің шешімін қалалық Қоғамдық кеңес ұсынды.

Колледж студенттері ыстық тамақ үшін өтемақыны ақшамен де, азық-түлікпен де ала алады. «Бірақ ақшаны жастар өз қалауы бойынша жаратуы мүмкін», - дейді ата-аналар. Оның орнына азық-түлік себеті тиімдірек екенін айтты.

Любовь Дубровина, қала тұрғыны

- Студенттің қолындағы ақша үйге жетпейді. Олар түрлі бос дүниелерге, компьютерлік ойындарға, гаджеттерге және тәттілер мен сусындарға жұмсалып кетеді.

Қалалық қоғамдық кеңес мүшелері Алматыдағы көпсалалы, құрылыс-техникалық және технологиялық колледждерін зерттеген. Нәтижесінде азық-түлік жиынтығы ақшалай өтемақыға қарағанда тиімдірек екен. Мысалы, әр студентке 25 келі қант, 20 келі ұн, 25 келі күріш, бірнеше қап макарон, сүт, бұқтырылған ет, май және кофе де беріледі.

Махамбет Хасенов, Алматы қ. Қоғамдық кеңесінің төрағасы:

- Студенттерге азық-түлік себеті берілсе, олар оны үйге алып келеді. Ал, ақшаны мақсатсыз жаратуы әбден мүмкін. Одан да аталған азық-түлік себеті бір отбасға біраз уақыт азық болады. Студент отбасына пайдалы әрекет жасайды.

Жұмысшы мамандығында білім алып жатқан студенттерді қолдау бағдарламасы жергілікті бюджеттен қаржыландырылады. Қоғамдық кеңес болса, білім басқармасына аталған азық-түлік себетіндегі өнім түрлерін көбейтуді ұсынды.

Авторлары: Аршын Кемелжан, Валентин Лобанов