Алматыда бұқаралық ақпарат құралдарының кәсіби мерекесіне орай белгілі журналист, спорт комментаторы Амангелді Сейітханды еске алуға арналған бильярдтан турнир өтті, деп хабарлайды 24KZ. «Жеңісті күндерде жүздескенше» деп аталатын спорт шарасының ұймдастырушысы – «Ақ жол» демократиялық партиясы.

Турнир осымен төртінші жыл қатарынан ұйымдастырылды. Ақпарат, мәдениет, әдебиет саласының майталмандарынан құралған 10 команда бақ сынады. Қатысушылардың бәріне алғысхат пен кәдесыйлар тарту етілді. Ойыншылар келер жылы дәл осы уақытта бильярд турнирінде бас қосуға уәде етті.

Қайнар Олжай, ардагер журналист:

- Қазақ журналистикасында өзі спорттың тақырыбы қиындау. Себебі термині көп. Ұғымдары көп. Оның бәрін қазақы ұғымға жеткізген бірден-бір журналист Амангелді болды. Бұл турнирге Алматы ғана емес, Астанадан келіп қатысып жатыр. Оның барлығы – Амангелдіні сыйлағаны, Амангелдіге деген құрмет. Демек Амангелдінің спорттағы аты да өшпейді. Қаншама Олимпиада чемпиондарын Амангелді құттықтады. Олимпиада чемпионы болғанда сүйінші сұрады. Дауысы біздің құлағымыздан кетпейді. Сондықтан бұл турнир өте орынды, ретімен өткізіліп отыр.