Бүгінде садақ ату өнері жаңа трендке айналып келе жатыр.

Бұған Абай облысында садақ атудан бірнеше орталықтың ашылуы дәлел. Мамандардың сөзінше, Семей жастарының ұлттық спортқа қызығушылығы артқан. Күні кеше садақ ату ойынынан жарыс ұйымдастырылды. Оған 50-ден астам адам қатысты.

Рүстем Қайратұлы, тілші:

- Бұрын жаудан қорғану және аң аулау мақсатында қолданылған садақ ату бүгінде танымал спорт түріне айналды. Мамандардың айтуынша, бұл спортқа қызығушылық танытатын жастардың саны күн санап артып келеді. Қазіргі таңда Семей қаласында дәстүрлі садақ атумен айналысатын үш орталық жұмыс істейді. Онда екі жүзге жуық бала тұрақты түрде жаттығады.

Ерасыл Нұрбекұлы екі жылдан бері жебе мен садақты жанына серік еткен. Қолы босай қалғанда дәстүрлі садақ ату орталығына келіп дайындалады. Бүгінде облыстық, републикалық жарыстарға қатысып жүлдемен қайтып жүр. Енді еліміздің намысын әлем аренасында қорғағысы келеді.

Ерасыл Нұрбекұлы, садақшы:

- Осы садақ атуды ең басында білмедім мен. Инстаграмнан қарадым. Инстаграмда алаш мергендерінің клубын көрдім. Олар неше түрлі видео салады. Соған қарап қызығып кеттім. Мақсат қойдым скоро Қазақстанға шығамын. Өзіме кмс деген звание аламын.

Садақ атудан жарысты жергілікті жастар ұйымы өткізді. Құрамында мынан аса мүшесі бар бұл ұйым жастардың басын бір арнаға тоғыстырып, уақытын пайдалы өткізуге елеулі үлес қосып жүр. Мергендік өнер сабырлы мінез қалыптастырып, бойға сенімділік ұялатуға көмектеседі, дейді ұйым төрағасы.

Жасұлан Құмаров, жастар ұйымының төрағасы:

- Мейрам қарсаңында осы садақ ату қазақтың ұлттық ойынын біз өзіміз ұйымдастырып отырмыз. Жастардың басын қосу ол қиын емес деп ойлаймын. Өйткені садақ ату ол біздің ертеден келе жатқан дәстүріміз болып табылады. Ол тек қана ұлттық ойын емес, ата-бабамыздың бізге қалдырған асыл мұрасы болып табылады.

Құдайберген Ерғалиев:

- Осындай жарыстардың көп болғанын қалаймыз,қаламызда. Рухың сергиді дейді ғой. Әрбір нысанаға тиген сайын, оғың тиіп жатса ләззат аласың да содан. Садақ атқан уақыт бекер кетпейді.

Садақ ату адамның жас ерекшелігіне қарамайды. Бастысы ынта мен жігер болуы қажет,-дейді мамандар. Семейдегі дәстүрлі садақ ату орталықтары бір жыл бұрын ашылған. Қазір спортшылар көптеген жарыстарда топ жарып жүр. Жақында Абай облысының спортшысы Мадина Мәденова Қазақстан құрамасының атынан садақ атудан әлем кубогына қатысады.

Болат Ақжігітов, облыстық ұлттық және ат спорты түрлері бойынша спорт клубының директоры:

- Бүгінгі таңда спорт клубымызда он спорт түрінен 830-дан астам спортшы бар. 38 жаттықтырушы қызмет атқарады. Соның ішінде дәстүрлі садақ ату бөлімі де жұмыс жасап жатыр. Төзімділікті және эмоционалды тұрақтылықты дамытатын спорт түрі. Себебі нақты жекпе-жекке қалған кезде екі спортшының арасында кім эмоционалды тұрақты сол жеңеді.

Биыл ұлттық спортты дамытуға бюджеттен 140 млн теңге қаржы бөлінбекші. Ал дәстүрлі садақ ату орталықтарын шалғайдағы аудандарда ашу көзделіп отыр.

Рүстем Қайратұлы, Берік Жобалайұлы