Цифрлық дамудың озық үлгілері жоғары оқу орындарында да кеңінен қолданылып отыр.

Онлайн жүйенің оң мүмкіндіктерін сарқып, білім алушылар үшін тиімділігін арттыруда Еуразия ұлттық университетінің де ұсынары мол. Студенттердің сапалы білім алуына қолайлы жағдай жасау мақсатында оқу ордасы қағазбастылықты қысқартып, онлайн қызметтің қолданылу аясын кеңейткен.

Алтынбек Зұлқаржап, Л.Н.Гумилев атындағы ЕҰУ цифрлық даму секторының менеджері:

«Осы мақсатта, яғни студенттің бізге талапкер ретінде тіркеліп, құжаттарын өткізіп, кейбір сындарын беру және де біздің университетпен келісімшарт жасауы, оның жатақханаға орналасуы. Осының барлығы ашық, әділ болуы үшін цифрландырумен негізінде айналысамыз».

Бұған сәйкес, білім алушылар басшылыққа керекті құжаттарды санаулы минутта жөнелтіп, жауабын кеңсе табалдырығын тоздырмай-ақ онлайн түрде жылдам ала алады.

Данияр Серікбай, Л.Н.Гумилев атындағы ЕҰУ 1-курс студенті:

- «Смарт Ену арқылы документтерді қаптап толтырып әкелмей, бәрін онлайн тапсырып жатырмын. Қазір өзім сол нәрсеге қол қояйын деп жатырмын Смарт Ену арқылы, жатақханаға орын алу үшін».

Цифрлық мүмкіндіктің артуы оқу орны мен студенттер арасындағы байланыстың беки түсуіне де септігін тигізуде. Арнайы ашылған чат-бот соның бір дәлелі.

Айғаным Бейсенбаева, Л.Н.Гумилев атындағы ЕҰУ аға бизнес талдаушысы:

- «Жалпы жиі қайталанатын сұрақтар болады ғой факультет бойынша, оқу бағдарламасы бойынша, жатақхана бойынша. Сол сұрақтардың барлығын өңдеп, Смарт Ену жүйесіне енгіздік және оны Телеграм ботпен байланыстырдық. Сол жерде қазіргі уақытта 1000 сұрақ өңделіп, 300 сұрақ базаға қосылды. Ол жерде автоматты түрде жауап беріледі. 24/7 жұмыс жасайды телеграм бот».

Университет қабырғасында қолданысқа енген тың технология тетіктері мұнымен шектелмейді. Оқу орны көру қабілеті нашар жандардың сабақ арасында еркін қозғалуына мүмкіндік жасау үшін инклюзивті гид құрылғысын ойлап тапқан. Құрылғы мүмкіндігі шектеулі студенттерге аудио арқылы жол сілтейді.

Айбол Тілеухан, Л.Н.Гумилев атындағы ЕҰУ Цифрлық даму секторының аға жасақтама әзірлеушісі:

«Яғни бұл құрылғы қалай істейді? Бірінші, осылай мойынға іліп алады. Сосын алғашқы келген кьюар анықталған соң, қасында батырмасы бар. Соған басып, «маған осындай кабинет керек» деген сияқты ақпаратты береді. Құрылғы сол ақпаратты өңдеп, оған қалай баруға болатынын есептеп, адамға құлаққап арқылы нұсқаулық беріп отырады».

Оқу тиімділігін күшейтуде білім ордасы жасанды интеллектінің мүмкіндіктерін де молынан пайдаланбақ. Бұл бағытта жыл соңына дейін ғылыми ізденіс жұмыстарына арналған жаңа ақылды құрылғылар қолданысқа берілмек.

Назым Кенжебай, Ержан Рахманбердиев