Қазақстанда жасалған қатерлі ісікке қарсы дәрі биыл ресми түрде тіркеліп, нарыққа шығуы мүмкін, деп хабарлайды 24kz.

Мұны Үкіметте өткен брифингте Ғылым және жоғары білім министрі мәлімдеді. Саясат Нұрбектің айтуынша, препаратқа қатысты қазір тиісті сынақтар жүргізілуде. Былтыр тек тоқ ішек обырына қарсы дәрі тестіленген. Ал бүгінде онкологиялық аурудың барлық түрі қамтылып отыр. Зерттеулердің нәтижесі «тұрақты» деп бағаланады. «Ал оған қатысқан науқастардың реакциясы жаман емес», - дейді министр.

Саясат Нұрбек, ҚР Ғылым және жоғары білім министрі:

- Былтыр сынақтардың бірінші деңгейін аяқтадық. Кейін бірден екіншісін бастап кеттік. Қазір зерттеулерге қатысатын науқастардың саны артып отыр. Орташа есеппен алғанда қатерлі ісіктердің көлемі 30%-ке азайды. Ал арнайы процедурамен тестілеуге қатысқан науқастарда ремиссия басталып жатыр. Нәтижелер өте жақсы деп айта аламыз. Сондықтан жыл соңына дейін қатерлі ісікке қарсы дәріні ресми тіркеп, оны нарыққа шығару көзделді.