Алматыда жалғызбасты және психикалық ауытқуы бар адамдардың пәтерін заңсыз сатқан қылмыстық топ мүшелері сотталды .

Бұл іс бойынша 22 адам айыпталушы деп танылды. Бүгін сот үкімімен олар 3 жылдан 18 жылға дейін бас бостандығынан айырылды. Ұйымдасқан қылмыстық топ 2017-2023 жылдар аралығында жұмыс істеген. Оның құрамында психиатр-дәрігерлер, нотариус, риелторлар және бұрын құқық қорғау саласында жұмыс істеген қызметкерлер болған. Оларға адамдарды ұрлау, кісі өлтіру және психикалық ауытқуы бар қарттарға зорлық-зомбылық көрсетіп, баспанасынан айыру бойынша айып тағылды. Тергеу жәбірленушілерге келтірілген материалдық шығынды 668 миллион теңгеге бағалады. Қаскөйлер 29 пәтерді сатып үлгерген. Сондай-ақ иесі қайтыс болған екі баспанаға қатысты алаяқтық әрекет жасалған. Істе барлығы 37 эпизод бар. Ең ауыр жазаны ұйымдасқан қылмыстық топтың басында тұрғандар алды. Сот үкімі әлі заңды күшіне енген жоқ.

Ерлан Болатов, Алматы қаласы Қылмыстық істер жөніндегі мамандандырылған ауданаралық сотының судьясы:

- Сот Ирина Юсуповна Гаппарованы қылмыстық құқық бұзушылық жасағаны үшін кінәлі деп тану туралы үкім шығарды. Үкімдерді ішінара қосу арқылы 18 жыл бас бостандығынан айыру белгіленсін. Жазасын қауіпсіздігі орташа түзеу мекемесінде өтейді. Болтабоев Әшірәлі Фазылұлы қылмыстық құқық бұзушылық жасағаны үшін кінәлі деп танылып, 17 жыл бас бостандығынан айыру белгіленсін.