Атырау облысында жалғыз тұқымбақ қалпына келтіріліп жатыр.

Былтыр көктемде шаруашылық қиын жағдайға тап болып, 1,5 миллионнан астам түп өскін су астында қалған. Қазір аумағы 164 гектарға жетіп, ағаштардың жаңа түрі жетіліп келеді.

Жаз бойы бел жазбай еңбек еткен орманшылар тұқымбақтың екі гектарын жайқалтты. Қазір мұнда жергілікті климатқа бейімделген сан алуан ағаш түрі жетіліп келеді. 164 гектарда 227 мың түп көшет көктеді.

Марат Жарылғасов, тұқымбақ агрономы:

- Тұқымнан егілген көктемде. Шығысы жаман емес. Енді, алдағы көктемнен бастап орман алқаптарына белгіленген жерлерге қосымша осы көшеттерді көшіреміз. Қазіргі тұқымбақта үйеңкі, шаған, қаратал тұқымдары шығуда. Стандарт бойынша 50 см-ден 1,5 метрге бар.

Арыстанбек Кенже, тілші:

- Бұл көшеттердің барлығы жергілікті орман алқабынан жиналған дәндерден өсіп шыққан. Қазір көріп тұрсыздар, биіктігі менің бойыма жақындап қалған. Жалпы орманшылар болашақта осы ағаштарға қосымша көктал мен жидек ағашын да егіп көрмек.

1,5 млн көшет жарамсыз болып қалды

Былтыр көктемде Жайық бойындағы орман шаруашылығын шайып кетті. Салдарынан төрт учаскеде бапталған 1 млн 600 мың түп көшет жарамсыз болып қалды. Енді биыл сукелді жерге шыққан арамшөп орманшылардың қалыпты жұмысына кедергі келтірген.

Жаңбырбай Мұқанғалиев, мекеме инженері:

- Былтыр су келуіне байланысты біздің жерімізді шөп басып кетті. Сол шөп басқан 100 гектардай жерді дайындап қойдық. Жұмыс жоспары бойынша соларды дайындап, сосын су құбырларын жүргізіп, соларға көшеттер егу жұмыстары басталады. 25 қазанда бастаймыз.

Биылғы ауа райы орманшыларға жұмысты жалғастыруына мол мүмкіндік беріп тұр. Төрт трактор су басқан алқаптың арам шөбін орып, тұқымбаққа орын дайындау үстінде. Олар жер қатқанша 164 гектар алқапты игеріп, 476 мың түп көшет егеді. Жалпы мемлекет басшысының тапсырмасы бойынша Атырау облысында 2030 жылға дейін 5 млн түп ағаш көшеті егілуі тиіс.

Арыстанбек Кенже, Амантай Мәтенов, Жандос Рахметуллин