Париждің әйгілі концерт залы Саль Гаво ((Salle Gaveau)) сахнасында Қазақстанның опера жұлдызы Майра Мұхамедқызының мерейтойлық концерті өтті.

Іс-шара еліміздің Франциядағы Елшілігінің қолдауымен ұйымдастырылды. Қазақстанның халық әртісі, Шымкент қалалық опера және балет театрының директоры Майра Мұхамедқызы Каччини, Верди, Лист, Рахманинов сынды әлемдік классиктердің туындыларымен қатар қазақ музыкасының шедеврлері Төлебаев Брусиловский,. Жұбановтың шығармаларын орындады. «Абай» операсынан ария мен халық әндерін ұсынды. Әншіні фортепианошы Әлияр Өтетілеу мен Шымкент квартеті сүйемелдеді. Саль Гаво залындағы кеш Франция астанасының мәдени өміріндегі жарқын оқиғаға айналды. Концерт халық әртісінің шығармашылығына 30 жыл толуына орай ұйымдастырылды. Майра Керей әйгілі француз театры Опера Гарньеде өнер көрсеткен жалғыз қазақстандық опера әншісі.

Майра Мұхамедқызы, Қазақстанның халық әртісі, опера әншіcі:

- Енді Париж деген, былай айтқанда, өнердің ошағы ғой. Осы жерде бүкіл өнердің түр түрі дамыған ел. Сондықтан мен осындай керемет залда, бүгін сіздермен қауышып, осындай өнер сүйетін публикаменен, солардың алдында ән салғаным үшін оның үстіне менің өнердегі отыз жылдығымның тұсау кесерінде осы Париждің Гаво залында өтіп жатқанына өте бақыттымын. Жоспарларымның ішінде үлкен Нью-Йорк бар, Бейжің бар, солардың барлығына барып осы отыз жылдықты біраз театр сахналарында айтатын боламын.

Адриана Абаскаль, көрермен:

- Өте әсерлі және шабыттандыратын кеш болды. Майраның өнері керемет дауысымен шектелмейді, ол әр шығарманы ерекше жүрекпен орындайды. Концерттен керемет әсер алдым.

Неслихан Өзтүрік, концерт қонағы:

- Мен үшін өте үлкен қуаныш болды. Мен ағаммен бірге келдім. Біз Мұстафа Өзтүріктің балалары боламыз. Сол үшін Парижге келгенбіз, Майра әпкенің концерті үшін өте қатты қуанды. Майра әпкенің концертін тындап, біздің қазақ рухымызды үлкен дәрежеде көтеріп, сол үшін өте қуаныштымыз.