«Фискалдық саясатты реформалау қажет – бұл сөзсіз қажеттілік. Бюджет және Салық кодекстеріне де түбегейлі өзгеріс қажет». Бұл Ұлттық экономика министрі Серік Жұманғаринның пікірі. Ол Ұлттық құрылтайда осылай деп, сала серпілісіне қатысты өз ұстанымын жеткізді. Оның айтуынша, бюджет шығыстары өсіп, қазына тапшылығы 4 трлн теңгеге дейін өскен. Көптен бері талқыланып келе жатқан бюджет мәселесі – Құрылтайдың басты тақырыптарының бірі. Игі-жақсылардың басын қосқан келелі кеңесте экономиканың өсімі қаралып жатыр.

Бекзат Аманов, тілші:

- Былтыр экономиканың өсімі 4,8%-ке жетті. Негізгі капиталға 19,3 трлн теңге инвестиция салынды. Ал тікелей шетелдік инвестиция көлемі 13 млрд долларға жуықтады. Серік Жұманғаринның отырыстағы сөзіне сенсек, сан салада серпіліс бар. Бірақ мұның өзі жеткіліксіз. Қазына шығынға батып барады. Бұған әділетсіз белгіленген тариф жүйесі, салық, мемлекеттік қаржыландырудың көптігі әсер етеді екен. Алайда түйткілдің түйінін тарқатуға қатысты Үкіметтің нақты жоспары бар. Құрылтай мүшелері онымен танысып шықты. Таныса отырып, өздерінің ұсыныстарын да жеткізді. Атап айтқанда, кедендегі «бармақ басты, көз қысты» әрекетті тұсау, көлеңкелі экономикамен күресті күшейту ұсынылды. Айтылған пікірлердің басым бөлігі бюджет қаржысын үнемдеу, көрпеге қарай көсілуді меңзегенін айта кету керек. Әлеуметтік бағыт пен өңірлердің жайы да назардан тыс қалмады. Ал дәл осы уақытта көрші кабинетте Ғылым мен білім саласы қаралып жатқан еді. Биыл қатысушылар өте белсенді екенін бұған дейінгі шығарылымда айтқан едік. Біз күткендей, түстен кейінгі қос секция да ә дегеннен қызу талқы алаңына айнала кетті. Ұсыныстардың барлығы салмақты.

Тіл басқармаларын қайта ашу ұсынылды

Одан бөлек, мектеп салудың бірыңғай жүйесін әзірлеу және оқу сауаттылығын арттыру сынды ұсыныстар да болды. Осылайша қатар тұрған қос бөлменің бірі халық қалтасының қалыңдығын қаузап жатса, екіншісі санасының тереңдігін талқылады. Әлі де талқылап жатыр. Бүгін 4 секция да қызу, қарқынды өткенін айттық қой. Бірақ негізгі шешімдер мен ұсыныстар ертең болады. Себебі Ұлттық құрылтайдың негізгі отырысы ертең Президент Қасым-Жомарт Тоқаевтың төрағалығымен өтеді.