Мемлекеттік кеңесші Ерлан Қариннің қатысуымен қазақ халқының ұлттық ән-күйі мен фольклорлық мұрасы топтастырылған «Асыл мұра» аудиожинағының тұсаукесері өтті, деп хабарлайды 24KZ. Бұл Қазақстанның музыкалық тарихында халықаралық стримингтерде кеңінен таралған ең ірі жинақ.

Оның ішіне «Алтын қорда» сақталған 400 күй, 300 жыр-терме, 400 халық әні мен халық композиторларының әндері, 100 ертегі, 50 бесік жыры және 250 ретро хит ән енгізілді. Шығарманың көбі алғашқы орындаушылары жеткізген түпнұсқа күйде берілген. Жобаға енген таңдамалы 1500 аудиожазба Apple Music, Spotify, Yandex Music, YouTube Music сияқты 100-ден астам музыкалық платформаға жүктелді. Сондай-ақ туындылар «Қазақстан» телерадиокорпорациясының altynqor.com сайтына енгізілді. Ерлан Қарин «Асыл мұра» аудиожинағының жарыққа шығуы төл мәдениетіміздің дамуына тың серпін беретінін атап өтті. Жинақ еліміздегі ұлттық кітапханаларға, Өнер университеттерінің кітапханаларына беріледі, сондай-ақ еркін саудаға шығарылады.

Ерлан Қарин, Қазақстан Республикасының Мемлекеттiк кеңесшісі:

- 50-ден астам онлайн платформалар, яғни Қытайда, Еуропада, АҚШ, яғни әлемнің әрбір өңірлерінде қолданылатын түрлі танымал онлайн платформаларда бүгіннен бастап қазақтың дәстүрлі өнер туындылары қолжетімді болады. Бұл жай ғана жинақ емес. Болашақта жасанды интеллект енді біздің мәдениетімізді өзінің есептеулерінде көрсін деген оймен. Бұл жоба – қазақ музыка өнерін, жалпы қазақ дәстүрлі өнерін әрі қарай да болашақтың игілігіне жаратуға бейімдеп, соған жағдай жасау.