Елімізде жылжымайтын мүлікті сақтандыру жүйесін жетілдіру керек. Түрлі табиғи апаттың салдарынан туындайтын қаржылық шығындар ел бюджетіне салмақ салуда. Сол себепті саладағы өзекті мәселелерді зерттеп-зерделеу қажет. Мәжіліс депутаты Елнұр Бейсенбаев осылай деп, Премьер-министр мен Қаржы нарығын реттеу және дамыту агенттігінің төрағасына сауалын жолдады.

Депутат сақтандыру саласында банктердің рөлін қайта қарастыруды ұсынды. Мысалы жер сілкінісі жағдайында тұрғындардың кепілде тұрған мүлкіне залал келуі мүмкін. Сондықтан банктер кепілдегі мүлікті өз есебінен сақтандыруы керек.

Елнұр Бейсенбаев, ҚР Парламенті Мәжілісінің депутаты:

- Сақтандыру келісімшартында кепілдегі мүліктің нарықтық құнын көрсету міндеті енгізілуі керек. Ипотекалық несие беру кезінде заемшыларға сақтандыру компаниясын таңдау құқығы берілуін қарастырған жөн. Сондай-ақ азаматтарға қаржылық ауыртпалық болмасын, яғни, әрбір банк кепілдегі мүлікті өз есебінен сақтандыруға міндеттелуі тиіс. Үкімет пен тиісті агенттік табиғи апаттардан жылжымайтын мүлікті міндетті сақтандыру туралы заң жобасын әзірлеп, Парламент қарауына енгізуі қажет.