Ыстанбұл мэриясы алдындағы шерулер тоқтады. Бұл туралы оппозициялық «Республикалық Халық партиясының» басшысы Өзгүл Өзел мәлімдеді. Оның айтуынша, ендігі наразылық акциясы сенбі күні шаһардың Азия бөлігіндегі Малтепе алаңында «Экрем Имамоглу бостандыққа шықсын» деген ұранмен өтеді. Сол жерде оппозициялық партия президенттікке үміткерін жариялайды.

Ыстанбұл қалалық муниципалитет мәжілісі уақытша мэр етіп Нури Асланды сайлады. Ол — қамауға алынған Экрем Имамоглудың сенімді серігі. Оның кандидатурасы дауыс беру арқылы тек үшінші кезеңде бекітілді.

Нури Аслан, Ыстанбұл мэрінің міндетін атқарушы:

- Біздер Экрем Имамоглудың жолдастары ретінде уақытша оның аманатын алдық. Ыстанбұл халқының дауысымен сайланған бұрынғы мэр көп ұзамай арамызға қайта қосылады. Оның аманатына жауапкершілікпен қараймыз.

Ыстанбұл мэриясы орналасқан Сарачханедегі наразылық шерулері аяқталды. Оппозициялық «Республикалық Халық партиясы» жетекшісінің сөзінше, шеру тоқтағанымен қарсылық пен күрес жалғасады.

Өзгүл Өзел, «Республикалық Халық партиясының» жетекшісі:

- Сарачханені, шынайы Ыстанбұлды, Экрем Имамоглудың атынан Нури Асланға тапсырамын. Ендігі шеруді жұма күні еңбек ұйымдарының қатысуымен бастаймын. Ал сенбі күні Малтепеде миллиондаған кісімен бірге Экрем Имамоглудың бостандыққа шығуын талап етіп, президенттікке үміткеріміздің есімін жариялайтын митингте кездесеміз.

Түркиядағы жаппай тәртіпсіздіктерге байланысты бір жарым мыңдай адам қамауға алынды. Ел президенті: «Түркия экономикасына қарсы жасалған кез келген саботаж сот алдында сұралады», – деді.

Режеп Тайип Ердоған, Түркия президенті:

- Бұдан былай түрік экономикасына, ұлттың әл-ауқаты мен тыныштығына қарсы жасалған кез келген әрекетке сот арқылы баға беріледі. Отанға опасыздық жасап, ұлт бірлігіне сызат түсіргендер әділет алдында жауап береді. Бұл реваншизм емес. Ұлт болып ұйысудың, мемлекетті сақтап қалудың негізгі шарты.

Естеріңізге сала кетейік, наразылық шерулерінің басталуына Ыстанбұл мэрі Экрем Имамоглудың қамауға алынуы себеп болды. Ол өткен аптада жемқорлық жасады және лаңкестік ұйымға қолдау бірдірді деген күдікке ілініп, қызметінен шеттетілген болатын. Қазір қамауда отыр. Сол процесі жалғасып жатыр.

Авторы: Меруерт Қанағат