Заң мен тәртіп өзіңнен басталады. Сыбайлас жемқорлыққа қарсы іс-қимыл агенттігінің Алматы қаласы бойынша департаменті басшысының бірінші орынбасары Жарқын Ғалымов осындай тақырыпта студенттерге дәріс оқыды.

Баяндамада заңдылық қағидаттары, құқықтық тәртіп және елдегі сыбайлас жемқорлыққа қарсы күрес стратегиясы туралы айтылды. Маманның пікірінше, мұндай шаралар сыбайлас жемқорлыққа нөлдік төзімділік идеологиясын дамытуға септігін тигізеді. Заң мен тәртіпке құрметпен қарап, оған деген мәдениетті қалыптастырады. Жастардың азаматтық жауапкершілігін арттырып, әділетті және ашық мемлекет құруға ықпал етеді.

Жарқын Ғалымов, ҚР СЖҚІҚ агенттігінің Алматы қаласы бойынша департаменті басшысының бірінші орынбасары:

- Лекция барысында студенттер құқықтық тәртіпке қатысты өзекті мәселелерді бізбен бірге талқылауға мүмкіндік алды. Сыбайлас жемқорлыққа қарсы мәдениеттің қалыптасуы әр азаматтың өзінен басталуы тиіс. Осындай кездесулер жастардың құқықтық сауаттылығын арттыруға, белсенді азаматтық ұстанымын қалыптастыруға және қоғамда адалдық пен заңдылық құндылықтарын насихаттауға ықпал етеді.