Жігітке жеті өнер де аз. Ақтөбелік Темірхан Иманғазин ілмек-бізбен тоқыма тоқуды кәсіп етіп, дәстүрлі қолөнердің қыр-сырын насихаттап жүр. « Мейірім » әлеуметтік бейімдеу орталығының тәрбиеленушісі қазақы нақыштағы әшекейлі бұйымдар жасайды.

Темірхан Иманғазин қолөнердің ер азаматтар елей бермейтін тоқыма түрін игерген. Саусақтары шапшаң қимылдай бастағанда жіп пен ілмектің ізінен кестелі орамал пайда болады. Бұл кәсіпті шебер балалар үйіндегі үйірмеде үйренген. Темірдей тәртіпке бағынатын мекеме тәрбиеленушілері спорттан бөлек шығармашылығын да шыңдауы тиіс еді. Бала Темірхан бос уақытын түрлі бұйым тоқуға арнаған.

Темірхан Иманғазин, «Мейірім» жастарды әлеуметтік бейімдеу орталығының тұрғыны:

- Басында бізде журнал болды. Сол журнал бойынша, схема бойынша тоқимыз. Содан әрі қарай біз YouTube арқылы мен үйрене бастадым. Кез келген бұйым. Тақия болсын... Мысалы, 22 наурызда көбі тақияға тапсырыс берді. Осындай тапсырыстар көп болды.

Ұлттық мәдениет пен заманауи стильді үйлестіре білген жас шебер қазір ілмек-бізбен бас киімнен бөлек жейде мен шалмалар, үстелге төсеніштің түрін тоқиды. Балалар үйінің түлектеріне арналған «Мейірім» орталығын кестелі бұйымдармен әшекейлеп тастаған. Өнерлі өренге бұйымтай айтып, тапсырыс беретіндер де табылады.

Айнұр Төлеген, «Мейірім» жастарды әлеуметтік бейімдеу орталығының тәрбиешісі:

- Мен осындай ет табақтың астына қоятын алдым. Бір күнде тоқып осылай әкеліп береді. Ұнайды өзімізге. Мақтанамыз Темірханмен. Осындай қолөнеріне. Рақмет айтамыз. Әрі қарай еңбегі жана берсін.

Әлеуметтік үйде тұратын Темірхан Иманғазин баспана сатып алуды көздейді. Қолы епті ісмер жігіт бұл жоспарын биылдан қалмай жүзеге асырары хақ.

Дария Абдуллина, «Мейірім» жастарды әлеуметтік бейімдеу орталығының педагог-ұйымдастырушысы:

- «Мейірім» жастарды әлеуметтік бейімдеу орталығында 15 бен 29 жас аралығындағы жастар тұрады. Олардың өздерінің баспаналары жоқ. Балалар үйінің тәрбиеленушілері. Балалар үйінен кейін олар осы жақта тұруға мүмкіндік алады.

«Мейірім» әлеуметтік бейімдеу орталығында 44 тәрбиеленуші тұрады. Олардың 11-і студент болса, қалғандары – бозбала шақтан кеткен қыз-жігіттер. Барлығы да – түрлі кәсіп игеріп, нәпақа тауып жүрген пысық жастар.

Авторлары: Мансұр Есқожин, Айнадин Молдабеков, Айбек Даутов