Биыл елде беделді 11 шетелдік жоғары оқу орнымен стратегиялық серіктестік орнатылады, деп хабарлайды 24KZ. Оның аясында бірқатар жаңа қосдипломдық бағдарламаны іске қосу жоспарланған.

Ғылым және жоғары білім министрінің кеңесшісі Руслан Емелбаевтың айтуынша, осы арқылы талапкерлер өз елімізде оқып, шетелдік университеттердің дипломына қол жеткізе алады. Сондай-ақ қазір өңірлерде «Study in Kazakhstan» көрмесі өтіп жатыр. Кез келген талапкер көрмеге барып, өзіне қажетті ақпаратты ала алады.

Айта кетейік, бүгінде республика аумағында шетелдік жоғары оқу орындарының 23 филиалы жұмыс істеп тұр.

Руслан Емелбаев, ҚР Ғылым және жоғары білім министрінің кеңесшісі:

- Ата-аналар, талапкерлер бұл ЖОО-лар туралы толыққанды ақпарат алып қоймай, оларға түсудің қандай шарттары бар, соның бәрімен танысуға мүмкіндік берілген болатын. Көрменің екінші кезеңі үшінші сәуір күні Ақтөбе қаласында өз жалғасын табайын деп отыр. 7-8-і Атырау қаласында және 10-11-і Маңғыстауда және Жаңаөзен қаласында осы Қазақстанда ашылып жатқан 23 филиал өкілдері барып, осы өңір талапкерлерімен, жұмыстарымен таныстырады.