Баянауыл ауданында жазғы туристік маусым небәрі үш айға созылады.

Осы қысқа мерзімде ұлттық парк екі жүз мыңдай туристі қабылдап үлгереді. Демалыс орындарының басым бөлігі Жасыбай көлінің жағасында шоғырланған.

Алайда биылғы жаз маусымы кәсіпкерлер үшін кедергілермен басталды. Себебі Баянауыл мемлекеттік ұлттық табиғи паркінің бас жоспары әлі бекітілмеген. Бұл маңызды құжат тек екі-үш айдан кейін ғана дайын болады. Оған дейін ұлттық парк аумағында кәсіпкерлік қызметке арнап жер берілмейді.

Қарлығаш Қасиетова, тілші:

- Енді екі аптадан кейін Баянауылда туристік маусым басталады. Жылда осы уақытта, дәл осы жерде қызу дайындық жүріп жататын. Жеке кәсіпкерлер сусын, балмұздақтарын әкеліп, ойын алаңдарын жасақтайтын. Биыл тым-тырыс, ұлттық парк Жасыбай көлінің жағасында сауда-саттыққа тыйым салды. Дүңгіршіктер алынып тасталған. Ал бар-жоғы үш айға созылатын қысқа мерзімде табыс табуды жоспарлаған жеке кәсіпкерлер кімнен көмек сұрарын білмейді.

Руслан Ақпанов балмұздақ саудасымен айналысады. Бұл өнім демалушылар арасында үлкен сұранысқа ие. Туристік маусым – табыс табуға және бизнес ауқымын кеңейтуге тиімді кезең. Алайда, Жасыбай көлінің жағасында биыл сауда жасауға рұқсат берілмейді.

Руслан Ақпанов, жеке кәсіпкер:

- Қысым прокуратурадан келеді, бұл заңсыз болғаннан кейін. Жер болмағаннан кейін. Ұлттық парктен болады, ескертулер жасалады. Ай сайын, апта сайын келіп ескертулер жасайды. Қолхат жинайды, ескертілді дегендей. Оның бәрі бізге тәуекел ғой. Қазіргі уақытта біз бәріміз сезонға дайынбыз. Тұрайық десек жердің рұқсаты жоқ.

Жасыбай жағасында кәсіптен қағылғандардың дені қарапайым ауыл адамдары. Олар киіз үйді жалға беріп, ат үстінде серуен ұйымдастырып, балаларға арналған ойын алаңдарын құратын. Осы уақытқа дейін заңсыз жұмыс істеп келген барлық кәсіпкерлік нысандар қызметі сот шешімімен тоқтатылды. Олардың арасында аудандық әкімдікке қарасты нысандар да бар.

Ардақ Кісентаев, Баянауыл ауданының әкімі:

- Ол жерде бізде арнайы дәретханалар мен күркелер орналастырылған. Ол жерде 200 дана шезлонг бар демалушыларға арнайы жасалған. Бұл жерде мәселе былай, ұлттық табиғи парк жаңағы дүңгіршіктерді заңдағы талаптарға сай келмейді дегесін ол кісілердің бүгінгі күні сыртқа шығару фактісі бар. Бірақ біз заң талабында ол мәселені қарастырып жатырмыз.

Аудан басшысы әзірге ұлттық парктің әрекетіне байланысты тек алты кәсіпкерден ресми шағым түскенін айтады. Биыл ерекше қорғалатын аумақта заңсыз салынған 44 кәсіпкерлік нысан жойылған.

Аждар Жүсіпов, Баянауыл мемлекеттік ұлттық табиғи паркінің директоры:

- Біз соттың шешімі бойынша жұмыс істейміз. Сондықтан барлық кәсіпкерлерге күтуге тура келеді. Парк жанында үйлестіру кеңесі жұмыс істейді. Ұлттық парктің 2025 жылға арналған бас жоспары екі-үш айда дайын болады. Қай бизнеске, қай жерден учаске берілетіні — сол құжат бекітілген соң ғана шешіледі.

Бұл қадам жергілікті кәсіпкерлер үшін ауыр соққы болды. Табыс көзінен айырылғандардың ісіне аудандық мәслихат депутаттары мен қоғамдық кеңес төрағасы араласып, мәселені Экология министрлігіне дейін жеткізді. Өйткені бұған дейін кәсіпкерлерге ауызша келісіммен жұмыс істеуге мүмкіндік беріліп келген.

Кәсіпкерлердің мәселесі бүгінгі күнге дейін әлі шешілген жоқ. Тағы да қауіп төніп тұр осындай тәуекел бар кәсіпкерлеріміз осы жылы да жұмыс істей алмайтын. Осы жергілікті елдімекеннің тұрғындарына өз кәсібін айналдыруға бізге рұқсат керек.

Баянауыл мемлекеттік ұлттық табиғи паркінің аумағында бас жоспарсыз жер берілмейді. Бұл құжат бекітілгеннен кейін ерекше қорғалатын аумақтағы барлық нысан тек осы жоспарға сәйкес құрылады. Туристік маусым ресми түрде келесі айдың 15-інде ашылады. Қазір Жасыбай демалыс аймағында 5 мың орындық, 54 демалыс үйі туристерді қабылдауға толық дайын.

Қарлығаш Қасиетова, Дәулет Қошқарбаев, Марат Игіліков