Биылғы жылдың 1 тоқсанында жер қойнауын пайдаланушы ірі компаниялар 1,1 трлн теңге сомаға жергілікті тауарларды, жұмыстар мен көрсетілетін қызметтерді сатып алған. Бұл әлеуетті әлі де арттыру қажет. Премьер-министр Олжас Бектенов Үкімет отырысында осындай тапсырма берді. Елдегі ірі жер қойнауын пайдаланушылар мен мемлекеттік органдар қазақстандық өндірісті қолдау бойынша бағдарлама әзірлеп, іске асыруы тиіс.

Былтырдан бері өңдеуші сектор өнім шығару жағынан тау-кен саласын басып озды. Үкімет басшысы: «Осы қарқынды үдете түсу керек», – деді. Ал елдегі барлық ірі кәсіпорындар өз айналасында шағын және орта бизнес белдеуін құрып, отандық тауарлар мен қызметтерді пайдалануын арттыруы керек. Осындай елішілік құндылық бағдарламаларын әзірлемегендер мемлекеттік қолдаудан құр қалатындығы ескертілді.

Олжас Бектенов, ҚР Премьер-министрі:

- Егер кәсіпорындар мұндай бағдарламаларды қабылдамайтын болса, оларға ешқандай мемлекеттік қолдау көрсетілмейді. Бағдарлама отандық кәсіпорындардан тікелей сатып алуды қамтамасыз етуге бағытталған. Бұл оларды локализациялау есебінен өндірістерді кеңейтуге және жаңа өндірістерді құруға ынталандырады. Сонымен бірге ел ішіндегі өндірістік тізбектерді кеңейте отырып, отандық компаниялардың арасындағы кооперацияны дамытуға жағдай жасау керек. Кәсіпорындардың өзара тиімді іс-қимылының арқасында ғана ел ішінде толық өндірістік цикл құруға болады.

Биылғы 4 айда өңдеу өнеркәсібі саласында 9 трлн теңге жуық соманың өнімі өндірілді. Былтырға қарағанда өсім бар. Атап айтсақ, машина жасау, химия өнеркәсібі, құрылыс, жиһаз өндірісі артқан. Министр металлургия, электрондық және жеңіл өнеркәсіп салалары импорт төмендеп, отандық өндіріс көлемі ұлғайғанын баяндады.

Ерсайын Нағаспаев, ҚР Өнеркәсіп және құрылыс министрі:

- Өңдеу өнеркәсібін қолдаудағы тиімді құралдардың бірі – реттелетін сатып алулар. Осы құралдың арқасында отандық тауарлардың 4834 позициясына басымдық берілді. Осы жылғы бес айдың қорытындысы бойынша мемлекеттік органдар отандық тауар өндірушілермен 303 миллиард теңге болатын 96 мыңнан астам келісімшартқа отырды. Бұл өткен жылмен салыстырғанда үш есе жоғары.

Отандық тауар өндірушілердің бірыңғай тізілімі жасақталып жатыр. Бірыңғай ақпараттық жүйені келер жылдың 1 қаңтарынан қолданысқа енгізу тапсырылды. Олжас Бектенов: «Қызметіне адал кәсіпорындар оған автоматты түрде қосылады», – деді. Бұдан былай өндірушілер басы артық тексерулерден құтылады. Ал «Жалған кәсіпорындар» бірыңғай тізілімге ене алмайды. Сәйкесінше нарықта сапалы өнім өндіруге ден қойылады.