Шығыс Қазақстан облысының Самар ауданында алғаш рет «Бір қабатты шығыс» бағдарламасы аясында бірнеше тұрғын үйдің құрылысы басталды.

Бұл өңірдегі көші-қон үдерісін тежеп, ауылды сақтау жолындағы нақты қадамдардың бірі. Соңғы он жылда өңірде 30 ауыл таратылған. Шалғайда тұратын жұрттың айтуынша, ауылды сақтап қалудың бірден-бір жолы — әлеуметтік және мәдени нысандар салу, инфрақұрылымды дамыту. Тек сол кезде ғана ауыл еңсесін тіктейді.

Шығыс Қазақстан облысында соңғы 10 жылда отыз ауыл картадан жойылды. Әсіресе шекара шебіндегі Катон-Қарағай,Тарбағатай, Күршім аудандарынан қалаға бет түзегендер көп. Өйткені инфрақұрылым нашар, мәдени-спорттық нысандар жоқтың қасы, барыс-келіс қиын. Облыс орталығына жақын Самар ауданының өзінде екі ауыл таратылуы мүмкін. Жаңажол елді мекені бұл тізімге кірмесе де мұндағы жұрт алаңдаулы. Кезінде 100-ден астам үй болса, қазір 50 аула қалды.

Майра Ниматова, Жаңажол ауылының тұрғыны:

- Мектеп болмаса клуб болмаса тозып кетеді біз сияқты кемпірлер қаламыз одан кейін шамасы келгендер қалаға кетеді қалаға жағдайымыз болса да менің барғым келмейді. Міне мына Қойтас жабылып қалды, мектеп жоқ көрдік бізге әкелді балаларын, Аққалаға апарды өте қиын жағдай болды.

Жаңажолдықтар осы бір аядай клубтың жөнделгеніне ерекше риза. Себебі осындай мәдени-спорттық нысандар салынса, ауыл тірлігі тұраламайды. Енді қарашаңырақтың орнын сипап қалмау үшін кәсіпке қолайлы жағдай жасалса, дейді қариялар.

Ерлан Сайфуллин, ауыл тұрғыны:

- Бұл кішкентай ауылды жерлердің шабындық жерлері де жоқ, не ертеректе бәрінен айырылып қалған не егістік жерлері жоқ, не шабындығы жоқ сонымен ауылды жерлер көшіп жатыр, ал жаңадан үй салынып бермейіншге ауылға жастар келмейді.

Расымен де Самарда соңғы жарты ғасырда бірде-бір жаңа баспана салынбаған мекендер бар. Бұл олқылық енді ғана жойылады.

Серік Жеңісов, Самар ауданының әкімі:

- Статистикаға қарағанда соңғы он жылда халық саны азайып жатыр, Самарда жалпы 1150 адам бар. Ауылды дамыту үшін не істеу керек бізде биыл «Бір қабатты Шығыс» бағдарламасы бойынша бірінші рет Самар ауданында 16 үй салғал жатырмыз.

Сондай-ақ ауданға оңтүстіктен 20 отбасы көшіп келеді. Бұл кейбір ауылды тарату туралы шешімді өзгертуі мүмкін.

Әлем Мамашев, ШҚО экономика басқармасының бөлім басшысы:

- Әрине егер ауыл халқы саны көбейсе онда бұл ауыл сақталады және бұл тізімнен шығуы мүмкін. Бұл жергілікті аудан әкімдіктерінің жұмысының нәтижесінен шығады.

Инвесторлар бас тарта алмайтын түрлі жобаларды да дамыту маңызды, дейді сарапшылар. Әрі бұл іс-шараларды жеделдетпесе болмайды. Облыста қазір «оңтайландыру тізіміне іліккен» 30 елді мекен бар.

Эльмира Ахметова, Жігер Бабаханов