Оңтүстік Кореяда өткен халықаралық мемлекеттік сатып алулар көрмесіне Қазақстанның 7 компаниясының өкілдері қатысты.

Көрменің басты мақсаты – кореялық өндірушілердің өнімдерін сатып алушыларға таныстыру. Іс-шараға 600-ге жуық шағын, венчурлік және инновациялық кәсіпорын қатысып, 1100-ден астам стенд орнатылды. Сонымен қатар, мемлекеттік сатып алулар бойынша семинар өтті, онда осы саладағы әлемдік үрдістер талқыланды. Қазақстандық компаниялар үшін жабдықтың әлеуетті жеткізушілерімен кездесулер ұйымдастырылды.

Гүлшара Қуанышбекова, «Аягөз Су» МКК қызметкері:

- Мен, мысалы, бізде су тоқтап қалған кезде, сол садиктерде, больницаларда су болмай қалғанда ана емкостер өте күшті емкостер. 8 тонна, 10 тонна, ең азы 8 тоннадан басталады екен. Ішіндегі суды екі айға шейін сақтап тұруға болады екен. Суық судың өзін екі ай ұстауға болады екен.

Чон Тэ Вон, Корея Республикасының Мемлекеттік сатып алулар қызметі департаментінің директоры:

- Қазақстан және Орталық Азия өңірі корейлік компаниялар үшін негізгі мақсатты нарықтардың бірі. Біздің кәсіпорындардың Қазақстанға деген жоғары қызығушылығына байланысты, Корея Республикасының Мемлекеттік сатып алулар агенттігі биылғы іс-шараға Қазақстаннан 7 компанияны шақырды. Біз үш жыл қатарынан 7 қазақстандық компанияны шақырып келеміз. Қазіргі таңда 30-дан астам оңтүстік кореялық компания өз өнімдерін Қазақстанға экспорттайды.