Түркістанда қасиетті күй өнерін дәріптейтін республикалық «Күй құдіреті» байқауы өтіп жатыр, деп хабарлайды 24KZ. Биыл 3-ші рет ұйымдастырылып отырған өнер сайысына еліміздің әр аймағынан келген 23 күйші қатысып, өз өнерін ортаға салып жатыр.

Бүгін түске дейінгі байқаудың алғашқы кезеңінде олар Түркістанның төл перзенттері, дарынды күйшілер Сүгір Әлиұлы мен Төлеген Момбековтың шығармаларын тартты. Екінші кезеңге өткендері түстен кейін «Сүгір» атындағы ұлт-аспаптар оркестрінің сүйемелдеуімен жеке домбырамен өнер көрсетеді. Бұл күйшілердің орындаушылық шеберлігімен қатар сахна мәдениеті мен күйді терең сезіну қабілетін бағалауға бағытталған. Дәстүрлі түрде жыл сайын өткізіліп келе жатқан байқаудың мақсаты – мәдени мұра мен ұлттық болмысты насихаттау, ұлы даланың төл өнері саналатын күйді ұлықтау.

Қайсар Ниязұлы, күйші:

- Бірінші кезеңде Сүгір Әлиұлының «Бес жорға» күйі мен төлеген Момбековтің «Қанағат» күйін ойнадым. Егер екінші кезеңге өтіп жатсақ, оркестрмен сүйемелдеп ойнаймыз. Енді «бап шаба ма, бақ шаба ма» дейді, құдай қаласа, бұйырғанын көрерміз.

Жанғали Жүзбаев, күйші, қазылар алқасының төрағасы:

- Байқаудың маңызы, мазмұны осы оңтүстік өңірдің, қарт Қаратаудың күнгей, теріскейіндегі күйшілік мектептердің барлығын қамтыған. Сол мақсатта Сүгірдің, Төлегеннің сирек орындалатын күйлерінің бағдарламасы жасалған. Сол талап мені қатты қуантты.