Өскеменде әуежайға қажетті мамандар арнайы даярлық курсынан өтіп жатыр, деп хабарлайды 24KZ. Президент тапсырмасымен Зайсан және Қатонқарағайда әуежай салынып жатыр. Ауқымды жоба жүзеге асқан кезде, кадр тапшылығы болуы мүмкін. «Сондықтан қос нысан тапсырылғанша білікті мамандарды даярлап алу маңызды», – дейді жауаптылар.

Екі әуежайдың да құрылысы келесі жылы бітеді деп жоспарланған. Стратегиялық нысан халыққа сапалы әрі жедел қызмет көрсету үшін білікті мамандар қажет. Кадр тапшылығының алдын алуға арналған шаралар қазірден басталды. 57 адам Өскемен әуежайында арнайы курстан өтіп жатыр. Оларға қызмет барысы тәжірибе жүзінде көреді.

Өскемен әуежайының ұжымы күнінне 10-12 рейске қызмет көрсетеді. Маржан Әділбекқызы Зайсан қаласының тумасы. Ол әуежайдағы жұмысты үйреніп, туған жерінде еңбек етуді армандайды.

Маржан Әділбекқызы, инспектор-профайлер:

- Бұл өмірлік тәжірибе. Болашақта маман ретінде жұмыс істеу, жүздеген жолаушының өміріне әсер ету – бұл үлкен мотивация. Сондықтан болашақта маман ретінде әуе қауіпсіздігі қызметіне үлкен үлес қосамын деген ойдамын.

Даярлық курсына кез келген адам қабылданбайды. Оған қатысу үшін бірнеше кезеңнен өтетін іріктеу ұйымдастырылды.

Арайлым Есімбекова, Еңбек мобильділігі орталығының директоры:

- Үлкен іріктеу ұйымдастырылады. Қазіргі таңда барлық кезеңнен өткен азаматтар жұмыс берушінің жұмыс орнында алты айлық оқыту курсын өтіп жатыр. Екі аудандағы әуежайдың, халықаралық әуежайлардың құрылысы аяқталып біткенше бұл жердегі мамандар кәсіби даярлықтан өтіп, қолдарына құжаттарын алып, жұмысқа дайын болады.

Курсанттардың бірнеше тіл білуі маңызды. Халықаралық әуежайлар ашылған кезде аймаққа келетін шетелдік қонақ саны көбейеді. «Мәселен, Зайсан ауданынна жыл сайын 20 мыңнан аса турист келсе, енді ол көрсеткіш 6 есе артуы мүмкін», – деп болжайды мамандар.

Авторлары: Эльмира Ахметова, Дмитрий Пыхтин