Димаш Құдайбергеннің әкесі әрі продюсері Қанат Айтбаев тағы алты құрылтайшымен бірге «Астана» халықаралық қаржы орталығының (МФХА) юрисдикциясында компания тіркеді. Қаржы орталығының тізілімінде тиісті жазба 28 қыркүйекте пайда болған, деп хабарлайды National Business.
Компания DQ Global Ltd деп аталады. Негізгі қызмет бағыты – бағдарламалық жасақтама әзірлеу. Компанияның басты бағыты мобильді қосымшалар жасау болуы мүмкін.
Қанат Айтбаев компанияның бас атқарушы директоры ретінде көрсетілген. Тағы бір директоры әрі құрылтайшысы – Ноян Төлегенов. Ең ықтимал нұсқа бойынша, бұл «Ақ жол» партиясынан Шымкент қаласы мәслихатының депутаты. Дегенмен Астанада ойын-сауық саласында қызмет көрсететін кәсіпкер Ноян Төлегенов болуы да мүмкін.
Компания Айтбаевтың ресми байланыс ретінде тіркеген электрондық поштасын МФХА юрисдикциясында тіркелген кемінде тағы екі заңды тұлға пайдаланады. Олар – 2025 жылы Нұрбол Баширов құрған Kazakhstan Cultural and Creative Industries Foundation холдингтік компаниясы және оның еншілес ұйымы KCCIF Management Ltd.
Қанат Айтбаев Kazakhstan Cultural and Creative Industries Foundation компаниясының да құрылтайшыларының бірі болып саналады.
Димаш Құдайбергеннің әкесі бұған дейін Ақтөбе облысының мәдениет басқармасын басқарған. Қазір ол негізінен ұлының продюсері ретінде қызмет етеді. Сонымен қатар жеке кәсіппен де айналысады.
Бұған дейін Қанат Айтбаевтың қатысуымен тіркелген жеті компания концерт ұйымдастырудан бастап азық-түлік жеткізуге дейінгі түрлі қызмет түрлерін көрсеткен.
Дереккөз: Skif News · Лунара Арынбек
