30 наурыз күні елімізде мәслихат депутаттарының сайлауы өтеді. Бұл мерзімінен бұрын өкілеттілігін тоқтатқандардың орнын толтыруға арналған саяси науқан болады. Республика көлеміндегі 14 облыста 35 мандат сарапқа салынады. Аймақтардың алдағы науқанға дайындығын Орталық сайлау комиссиясы төрағасы Нұрлан Әбдіровтің жіті назарында. Бүгін ол Ақтөбе облысындағы сайлау учаскелерінде болып, дауыс берушілермен де жүздесті.

Ақтөбе облысында алдағы саяси науқанда шығып қалған 6 мәслихат депутатының мандатына сайлау өтеді. Қазір әрбіреуіне кемінде 3 үміткерден тіркелген. Сондықтан ҚР орталық сайлау комиссиясының төрағасы өңірдегі әріптестеріне үлкен жауапкершіліктің жүктелгенін алға тартты. Қобда ауданындағы бірнеше сайлау учаскесінде болып, «дауыс беру құпиясын қамтамасыз ету, сайлаушыларды науқан туралы хабардар етіп, сайлау күні барлық қатысушыларға қолайлы жағдайлар жасау қажеттілігіне» ерекше назар аударды.

Нұрлан Әбдіров, ҚР Орталық сайлау комиссиясының төрағасы:

- 35 мандаттың 6-ы осы өңірде. Бір бірден облыстық және қалалық мәслихат болатын болса, 4 мандат ол аудандық мәслихаттың депутаттығына. Өз қызметтерін комиссиялар белсенді атқарып жатыр. Жұмыстарымен, дайындығымен таныстық. Өткізетін шараларға комиссиялар дайын болады деп мен сөз бере аламын.

Бұдан бөлек орталық сайлау комиссиясының төрағасы жас депутаттар және сайлаушылар, қоғамдық бірлестік өкілдерімен кездесті. Алқалы жиында конситуциялық реформалар сөз болып, Нұрлан Әбдіров елдің жаңартылған сайлау жүйесінің назары азаматтардың сайлау процестері арқылы мемлекетті басқаруға қатысуын кеңейтуге бағытталғандығын атап өтті.

Нұрлан Әбдіров, ҚР Орталық сайлау комиссиясының төрағасы:

- Конституциялық реформаның аясында іске асып жатқан жаңалықтар бұлар мүлдем жаңа ситуацияны туғызып отыр. Себебі әкімдердің 95%-тен астамы олар тікелей халықтың өзінің сайлауымен, дауыс беруімен сайланған әкімдер болмақшы.

Саяси науқанды заң талаптарына сай ұйымдастыру үшін сайлау комиссияларының мүшелеріне арналған семинар-тренинг өтті. Электораттық оқыту барысында қолданыстағы құқықтық-нормативтік база түсіндірілді. Мәслихат депутаттарын сайлау көптеген өңірде көктемгі су тасқыны кезеңіне сай келді. Сондықтан сайлау комиссияларына дауыс беруді қалыпты түрде ұйымдастыруға қосымша жауапкершілік жүктелген. Айта кету керек, комиссия мүшелері бұған дейін еліміздің 6 өңірінде болып, алдағы саяси науқанға дайындықты пысықтады.

Авторлары: Мансұр Есқожин, Айнадин Молдабеков, Айбек Даутов