Израиль әскері Газа секторында ХАМАС саяси бюросының қауіпсіздік министрі мен төтенше комитеті басшысының көзін жойды.

Бұл туралы еврей елінің қарулы күштері жария етті. Олар бірнеше күн бұрын 2 айға жалғасқан бітімнен кейін Газаны қайта атқылай бастады. Оған палестиналық ұйымның тұтқындарды босатудан бас тартуы себеп болған. Негізі осыған дейін Израиль әскері тек әуеден соққылар жасап келген. Ал кешеден бері Газада құрлық операциясын бастап кетті. Еврей елінің өкілдері ХАМАС нысандарын ғана көздейтінін айтады. Алайда атыс-шабыстан бейбіт тұрғындар да қаза болып жатыр. Ал кейінгі шабуылдардың бірінде БҰҰ-ның бір қызметкері көз жұмып, тағы бесеуі жараланды.

Хорхе Морейра да Силва, БҰҰ жобаларға қызмет көрсету басқармасының атқарушы директоры:

- Шабуылға ұшыраған ғимаратта БҰҰ-ның қызметкерлері тұрып жатқан. Израиль әскері бұл жайлы білетін. Бір адам қаза тапты. Жарақат алған әріптестеріміздің жағдайы ауыр. Бұл оқиғаға қатысты жіті тексеру жүргізіледі.