Соңғы 10 жылда алғаш рет Талас өзенінің төменгі ағысындағы Қаракөл көлі толды. Су ресурстары және ирригация министрлігі аймақтағы «Ойық» гидроторабы арқылы көлге су жіберді.

Тіршілік нәрін дұрыс әрі тиімді бөлудің нәтижесінде Сұлукөл көліне де су жетті. Сондай-ақ Сарысу және Талас аудандарының жайылымдарына да ылғал жайылды. Жергілікті экожүйені сақтау жұмыстары суару маусымы басталмай тұрып жүргізілді. Бастапқыда осы мақсатқа «Ойық» гидроторабы арқылы 120 млн текше метр су жіберу жоспарланған еді. Алайда сәуір айының ортасына қарай экологиялық мақсатта су жіберудің жалпы көлемі 315 млн текше метрге жетті.

Аралбай Жанбеков, Игілік ауылының тұрғыны:

- Су биыл ерте келді. Наурыздың басында басталып, мамырдың соңына дейін жетті. «Қазсушарға» алғыс айтамыз. Егістікте шөп жақсы өсіп жатыр, су мол. Қазір мал жайып, жұмыс істеп жатырмыз.

Оңлыәшім Дүйсенбеков, Шағалалы елді мекенінің тұрғыны:

- Биыл алдыңғы жылдарға қарағанда су қарқынды келді. Су негізгі арнамен өтіп, жайылымды жерлерге жайылды. «Қазсушарға» ризамыз, соның жұмысының нәтижесінде су жақсы келді. Осындай көлемде су жыл сайын келіп тұрады деп үміттенеміз.