АҚШ президенті Дональд Трамп пен оның әкімшілігіндегі Тиімділік департаментінің тізгіндеген миллиардер Илон Масктің арасында ши шықты. Дау Илон Масктің Мемлекеттік шығындар туралы жаңа заң жобасын сынауынан басталған. Осыған шамданған Трамп: «Электромобильдерге арналған мемлекеттік көмек қаржының қысқаруы Масктің шымбайына батты», – деп мәлімдеді. Бірақ миллиардер Ақ үй басшысының бұл сөзін: «Қып-қызыл өтірік», – деп айыптады. Маск әлеуметтік желідегі парақшасында: «Менсіз Трамп сайлауда жеңіліп, демократтар Өкілдер палатасын бақылауына алып, республикалықтар Сенатта 51-ақ орынға ие болар еді. Жақсылықты бағалай алмайды екен!», – деп қынжылған. Ол өз партиямды құрамын деп сауалнама жүргізді. Оған қатысқан 2,5 миллионнан астам адамның 80%-і Илон Маскті қолдады.

Дональд Трамп, АҚШ президенті:

- Қатты көңілім қалды. Өйткені Илон бұл заң жобасы туралы осында отырғандардың бәрінен де жақсы білді. Ол бәрінен хабардар болатын. Ешқандай мәселе туындамаған еді. Электромобильдерге қаржыны қысқартуымыз қажет болғанда ол аяқастынан шала бүлінді.

Масктің Tesla компаниясының акциялары 15% құлдырады. Сондай-ақ Трамптың 2021 жылы негізі қаланған Trump Media & Technology Group компаниясының құнды қағаздары 11% арзандап кетті.