Алдағы 2 жылда «Реновация 1300» жобасымен Атырау облысында 12 мектеп жаңғыртылады.

Оның 9-ы Индер ауданындағы білім ошақтары. Қазір Елтай ауылындағы мектеп ғимаратын жөндеу басталып кетті. Жобаның мақсаты- ауыл мектебін қала мектебімен теңестіріп, оқушылар үшін жайлы орта қалыптастыру.

Елтай ауылындағы мектеп ғимаратының іргетасы 1971 жылы қаланған. Кейін бала санының өсуіне байланысты қосымша жапсаржай мен малшы балалары үшін интернат салыныпты. 40-50 жылдан бері күрделі жөндеу көрмеген ғимараттар әбден тозған. Қазір құрылысшылар 3 бригадаға бөлініп жөндеу жұмыстарын бастап кетті.

Дастан Қалжігітов, мердігер мекеменің өкілі:

- Терезелер ауысады, батарея, жылу жүйесі ауысады, кәріз жүйесі ауысады, ток ауысады, бүкіл пожарная сигнализация дейміз сол, камера түгел ауысады. Едені ауысады төбе қырылып, кері жағылады. Толықтай жөндеуден өткіземіз. Бұйырса, жаңа оқу жылына дейін бітіреміз деген ойдамыз.

Елтай ауылындағы орта мектепті жөндеуге облыстық бюджеттен 679 млн теңге бөлінген. Мамыр айында іске кіріскен мердігерлер межелі мерзімде құрылысты аяқтауға жұмыла кірісуде. Жұмысты мектеп ұжымы өздері бақылауға алған. Жаңа ғимаратта оқушылардың алаңсыз білім алуына барлық жағдай қарастырылады, дейді мектеп басшылығы.

Сәбит Ешмұхамбетов, мектеп директоры:

- Ғимараттар біткеннен кейін көптеген әсіресе, мына инженерлік құрылғылар, іштегі дәретханалар, қол жуатын орын көптеген жағдайдалр болады. Мына электрмен қамтуға, интернеттің жылдамдығы күшейеді деп отырмыз. Қауіпсіздік мәселесі бойынша көптеген нәрселер жасалады. Жалпы жайлы орта қалыптасады.

Мектеп үйін жабдықтауға жергілікті бюджеттен қосымша 250 млн теңге қарастырылады деп күтілуде. Ол қаражат сынып-кабинеттерін жабдықтауға жұмсалмақ. Жалпы Атырау облысы бойынша 2025-2027 жылдары 12 ауыл мектебі мемлекет басшысының тапсырмасына сәйкес қолға алынған «Реновация-1300» жобасына енді. Оның 9-ы осы Индер ауданында орналасқан.

Арыстанбек Кенже, Айбек Байзақов, Жандос Рамхетуллин