АҚШ Мемлекеттік департаменті халықаралық студенттік визаларды беруді қайта бастайтын болды . Бірақ оларға өтініш берушілерді тексеруге өзгертулер енгізілген. Енді студенттер әлеуметтік желідегі парақшаларын ашық статуста қалдыруға міндетті.

Жергілікті билік шара АҚШ-қа және оның құндылықтарына қарсы кез келген жағымсыз пікірлердің бар-жоқтығы анықтау үшін қолға алынғанын айтады. Талапты орындамағандарға виза берілмеуі мүмкін. Азаматтық ұйымдар шешімді сөз бостандығын шектеу деп сынап жатыр. Кейінгі апталарда виза процестерінің тоқтатылуы бес мыңнан астам шетелдік студентке әсер еткен. Бұған дейін Трамп әкімшілігі антисемиттік көзқарастарға тоқтау салмады деп беделді білім ордаларына талаптарын қатаңдатты.

«Жаңа нұсқаулыққа сәйкес біз студенттік және алмасу бағдарламалары бойынша (F, M және J санатындағы) барлық өтініш берушілерге толық әрі жан-жақты тексеру жүргіземіз. Оған олардың интернеттегі белсенділігі де кіреді. Бұл үшін визаға өтініш білдірушілер әлеуметтік желідегі парақшаларын «ашық» күйде қалдыруы керек. Шетелдегі біздің өкілдіктеріміз аталған виза өтініштерін қабылдауды жуырда қайта бастайды».

АҚШ Мемлекеттік департаменті