20 маусымда Женевада Таяу Шығыстағы ахуал бойынша келіссөз өтеді. Иранның Сыртқы істер министрі Аббас Арагчи Германия, Франция және Ұлыбританиялық әріптестерімен кездеседі.

Басқосу Еуроүштік елдерінің бастамасымен ұйымдастырылғалы отыр. Оған Еуроодақ дипломатиясының басшысы Кая Каллас та қатыспақшы. Жиынның күн тәртібінде Иранның ядролық бағдарламасы мен Израиль шабуылдары қаралмақ.

Еске салайық, АҚШ пен Иран сәуірден бері Оманның арағайындығымен диалог жүргізіп келді. Оның 6-шы раунды 15 маусымда Маскатта өту керек еді. Алайда Израильдің шабуылынан кейін Тегеран кездесуден бас тартты.