Астанада 6 күннен кейін бокстан ерлер мен әйелдер арасында әлем кубогі басталады.

Оған 30-ға жуық елден 300-ден астам былғары қолғап шебері қатысады. Бұл олимпиадалық World Boxing ұйымының Қазақстандағы алғашқы жарысы. Яғни жүлдегерлерге рейтингтік ұпайлар үлестіріледі.

Жарыстың басталуына әлі 1 аптадай уақыт бар. Соған қарамастан өзге елдің спортшылары Астанаға арнайы ерте келіп, біздің боксшылармен біріккен оқу-жаттығу жиындарын өткізіп жатыр. Олардың қатарында әлем чемпионаттары мен Олимпиада ойындарының жүлдегерлері бар.

Қайрат Сәтжанов, бокстан ұлттық құраманың бас бапкері:

- 17-сі мен 29-ы аралығында осында біріккен оқу-жаттығу жиындары өтіп жатыр. Бұған ең бірінші болып АҚШ пен Канада келді. Бүгін мінеки Австралия, Сербия, Әзербайжан, Швеция командалары келді. Тағы 1-2 күн арасында Англия командасы келуі керек. Бүгінгі сапта тұрған боксшылар саны 80 боксшы болды.

Ұлттық құрама Әлем кубогіне үздік боксшылармен қатысады. Яғни барлық 20 салмақ бойынша бапкерлік құрам тек мықты спортшыларын қосқалы отыр. Десе де нақты тізім оқу-жаттығу жиынының соңында белгілі болады.

Қайрат Сәтжанов, бокстан ұлттық құраманың бас бапкері:

- Сол 1 жұма ішінде кімдер жақсы дайындықта болады сол бала жарысқа қатысады. Мына оқу-жаттығу жиыны жастарға өте жақсы болды. Әдейілеп осы жарысқа басшылықтан рұқсат сұрап, Төрехан Сабырхан, Санжар және Сейілхан Өнер, Алтынбек Нұрсұлтан сияқты жастар осы жиынға қатысып жатыр.

World Boxing аясында жыл сайын өткізілетін Әлем кубогы кезеңдері рейтингілік сайыс болып саналады. Әр салмақта жеңімпаздарға 300 ұпай берілсе, 2-орынға 200, 3-орынға 150 ұпайдан үлестіріледі.

Абылайхан Жүсіпов, бокстан ұлттық құрама мүшесі:

- Атмосфера керемет. Жігіттер жақсы еңбек етіп, тер төгіп жатыр. Балдар ептеп, бабына келіп жатыр. Жарысқа жақсы настроймен, бабымызда келеміз деген үміттемін. Өз жеріңде бокстасқан мүлде бөлек қой. Жақындарың, туыстарың, жанкүйерлер келеді. Бұл біз үшін керемет шоу, керемет мүмкіндік.

Айта кетейік, жарыс 30 маусым мен 6 шілде аралығында Астанадағы Ж. Үшкемпіров атындағы жекпе-жек сарайында өтеді. Одан кейін боксшылар Ұлыбританияғы әлем чемпионатына дайындықты бастайды.

Мерей Қанапия, Ербол Дайыров