Шығысқазақстандық шаруалар жаңбырлатып және тамшылатып суару әдісіне ден қоя бастады, деп хабарлайды 24kz.

«Бұл су үнемдеуден бөлек, құрғақшылық кезінде егінді күйіп кетуден сақтайды», — дейді мамандар. Суғару жүйесін таңдаған шаруа қожалықтарына мемлекет қолдау көрсетеді.

Эльмира Ахметова, тілші:

- Зайсан ауданында төрт шаруа қожалығы жаңбырлатып және тамшылатып суғару әдісіне көшті. Диқан Талғат Бархановтың айтуынша, сортаңы шыға бастаған егістік алқабына биыл жан кіргендей.

Шаруа 80 гектар жерге асқабақ, 150 гектарға күнбағыс екті. Енді еңбегім еш кетпес деген үмітте.

Талғат Барханов, шаруа:

- Биыл міне, Зайсанда құрғақшылық жаңбыр мүлде жауған жоқ осы жерге. Міне, осының арқасында көп экономдап тұрмыз. 50 скважина қаздық. Содан суарып отырмыз. Су көп кетпейді екен. Өзіміз есептеп отырмыз. Тәуліктік нормасы ары кетсе 70-80 гектарға 500 литр су кетіп тұр.

«Жалпы үнемдеп суғару ысырапшылдықтан ғана сақтамайды», - дейді мамандар. Бұл құрғақшылық болғанда егістікті аман алып қалудың да амалы. Әсіресе, суару каналдарының тозығы шығып, су тапшылығы сезілгенде бұл технологияның тиімділігі бірден байқалады.

Қайырбек Дүйсекұлы, агроном:

- Негізігі каналдан келген су жерге құмға сіңіп кетеді де, 70%-і, 30%-і ғана шаруа қожалығына келеді. Жолдың ұзақтығы бар дегендей. Енді осыны қолға алатын болсақ, келер жылы бұдан да жақсарамыз ба деп отырмыз.

Әзірге Зайсанда1200 гектар жер суғару жүйесімен қамтылған. Келер жылы бұл көрсеткішті екі мың гектардан асыру межеленіп отыр.

Жалпы облыста 84600 гектар суармалы жер болса, соның әзірге 30700 гектары суарылады. Ал 16300 гектар егістік алқабында су үнемдеу техникасын қолданылады.Оның ішінде 13300 гектар жер жаңбырлатып, ал 3 мың гектар жер тамшылату әдісімен суарылады.

Үнемдеп суару құрылғысын қолдануға ниетті қожалықтарға мемлекет тарапынан қолдау да бар.

Елдос Қуантаев, Ауыл шаруашылығы басқармасының бөлім басшысы:

- Су үнемдеу технологиясының шығыстарын өтеуге 80%-ке дейін субсидия қарастылыған. Бұл қолданылып жатқан шаралар Шығыс Қазақстан облысында жалпы суармалы жерлерде суды үнемдеу технологиясын енгізуге мүмкіндік береді.

Бір артықшылығы – жаңбырлатып суару әдісін құп көрген жергілікті шаруалар оған арналған техниканы алыстан іздемейді. Себебі өлкеде осындай құрылғыларды шығаратын зауыт іске қосылды. Сұраныс артқан жағдайда кәсіпорын жылына мың дана машина құрастыруға қауқарлы.

Авторлары: Эльмира Ахметова, Дмитрий Пыхтин