Әскери қызметте әйелдердің де рөлі соңғы жылдары артып келеді, деп хабарлайды 24kz.

Кей елдерде нәзік жандар міндетті түрде әскерге шақырылып, тіпті әскери операцияларға қатысады. Әсіресе, Израиль, Норвегия, Финляндия және Швецияның қорғаныс саласында қызмет етіп жатқан әйелдердің үлесі жоғары.

Нұрбике Жігер, тілші:

- Бүгінде көптеген елдерде әскери қызмет тек ерлердің ғана емес, әйелдердің де парызы мен мүмкіндігіне айналып отыр. Енді армияда қыздар тек медбике, байланыс не бақылаушы маман болудан тыс ұрыс қимылдарына да қатысады.

Жаһандық әскери құрылымдарда нәзік жандардың үлесі соңғы жылдары тұрақты түрде өсіп келеді. Мысалы, Ұлыбританияда негізгі әскерде қызмет ететіндердің 11,9%-і, ал резерв құрамындағылардың 15,9%-і әйелдер. Германияда 2023 жылдың соңында әскердегі бұрымдылардың үлесі шамамен 13,4%-ті құрады. Бұл өсім гендерлік теңдікке ұмтылыс пен жаһандық қауіпсіздік жағдайларының өзгеруіне байланысты әскери кадрларды толықтыру қажеттілігінен туып отыр. Әскери министрліктер қыз-келіншектерге арналған инфрақұрылым, жатақхана, киім-кешек және жабдықтарды жаңғыртуға көп көңіл бөліп жатыр. Дегенмен, жоғары лауазымдар мен офицерлік құрамда әйелдердің қызметі әлі де шектеулі болып қала бермек. Халықаралық сарапшылардың пікірі бойынша әйелдер әскери міндетке жауапкершілікпен, тәртіппен және табандылықпен қарайды.

Цитата: Жан-Пьер Лакруа, БҰҰ Бейбітшілік операциялары жөніндегі бас хатшысының орынбасары:

- Әйелдердің қорғаныс саласында қызмет етуі – тек гендерлік теңдік емес, стратегиялық қажеттілік. Кей жағдайларда олардың психикалық және физиологиялық ерекшеліктеріне байланысты жауапкершілік пен тиімділік жоғары болады. Әйелдердің әлеуетін толық пайдалану арқылы ұзақ мерзімді бейбітшілік пен қауіпсіздікке қол жеткізуге болады.

Қазір Израиль, Норвегия, Финляндия мен Швеция әйелдерді міндетті әскери қызметке шақыратын негізгі елдер. Израильдің Қорғаныс қызметі туралы заңы бойынша кәмелет жасына толған ерлер де, әйелдер де әскери қызметке тең шақырылады. Биыл Израиль армиясында қолына қару ұстап ұрысқа аттанғандардың 20,9%-ін нәзік жандылар құрайды. Олардың 58%-і ұрысқа толықтай дайын. Әйелдер үшін міндетті қызмет мерзімі 2 жыл, ал ерлерге 32 ай белгіленген. Тұрмыстағы немесе жүкті әйелдер, сондай-ақ медициналық және психологиялық себептері бар азаматшалар бұл міндеттен босатылады. Бейбіт уақытта әйелдер әскери қызметтің түрлі салаларында жоғары кәсіби қызмет көрсетеді, ал соғыс жағдайында олардың ұрысқа дайын болуы мен батылдығы елдің қорғаныс қабілетін нығайта түседі.

Авторлары: Нұрбике Жігер, Ғалымжан Абдулахат