Әлемде қант диабетіне шалдыққандар қатары артып келеді.

2050 жылға қарай олардың қарасы 1,5 миллиард адамға жетуі мүмкін. Мұндай болжам медициналық Ланцет журналында жарияланды. Ғалымдар мұны адамдар арасында семіздіктің белең алуымен және науқастардың дәрігерге уақытылы қаралмайтындығымен байланыстырады. Бүгінде әлемде қант диабетіне 400 млн адам шалдыққан. Көбі Үндістан, Қытай, АҚШ, Пәкістан және Индонезия тұрғындары. Өзекті мәселені шешу үшін жаһан ғалымдары қатерлі дертке қарсы қандай жаңа технология ойлап табуда?

Қытайлық ғалымдар қант диабетімен күресте бұрын-соңды болмаған жаңалық ашты. Олар 59 жастағы науқасты тіндерді трансплантациялау арқылы емдеп шықты. Зерттеу нәтижесі «Селл Дискавери» ғылыми журналында жарияланды. Науқас инсулинге 25 жыл бойы тәуелді болған. Ғалымдар медициналық жолмен ұйқы безінің тіндерін жасап, ағзасын ауыстырған. Себебі, адамның дәл осы мүшесі инсулин бөледі екен. 4 жыл бұрын жасалған отадан кейін науқастың қанындағы қанттың деңгейі көтерілмеген. Десе де, қытайлық ғалымдар " терапияның жаңа түрін қолданысқа енгізу әлі ерте. Қосымша зерттеу жұмыстары қажет, — дейді.

Ұлыбританияда жасанды интеллектпен қант диабетін анықтайтын алгоритмді ойлап тапты

Ұлыбританияда қант диабетінің алдын алу үшін жасанды интеллект қолданыла бастады. Мамандар 500 мыңдай науқастың бойындағы ауру белгілерін зерттеп, дертті ерте анықтайтын жаңа алгоритм ойлап тапты. Бұл жасанды интеллект дәрігерлердің жұмысын едәуір жеңілдетуі мүмкін. Ол адамдардың қант диабетіне шалдығу қаупін 13 жыл бұрын анықтауға қауқарлы. Скринингтің жаңа түрі миллиондаған адамның өмірін сақтап қалуға сеп болары сөзсіз, — дейді ғалымдар.

АҚШ-та жастар арасында қант диабетіне шалдыққандар артып келеді

АҚШ-та қант диабетіне қарсы дәрі-дәрмекке сұраныс 600 пайызға артты. Ең сорақысы, дәріхананы жағалайтындардың көбі – 12 мен 25 жас аралығындағы жастар көрінеді. Жан түршігерлік статастикаға қарағанда, қазір Құрама Штаттарда 15 млн жасөспірім семіздікке пен қант диабетіне шалдыққан. Дені спортпен емес, дәрі-дәрмек ішіп, салмақ тастағылары келеді екен. Ал Fortune Business Insight компаниясының дерегінше, диабетпен ауырғандарға арнаулы дәрінің 40 түрі қолдануға ұсынылады. Десе де, дәрігерлер қатерлі дерттің алдын алудың ең тиімді жолы дұрыс тамақтанып, спортпен шұғылдану, дейді.