Атырау облысы Жасқайрат ауылындағы сүт өңдеу цехы алғашқы өнімін нарыққа шығарды, деп хабарлайды 24KZ. Мұнда тәулігіне 1 тоннаға дейін сүт өңделіп, өнімнің 7 түрі дайындалады. Жалпы облыс бойынша алдағы 4 жылда ауыл шаруашылығы саласында құны 27,5 миллиард болатын 5 ірі инвестициялық жоба жүзеге асады. Оның ішінде ет-сүт өнімдері мен түрлі өсімдік шырынын шығаратын кәсіпорындар бар.

Цехта тәулігіне 1 тоннаға дейін сиыр сүті өңделеді. Бағымдағы 50 бас сауын сиыр тәулігіне 200 литрге дейін табиғи таза өнім береді. Пастерленген сүт, қаймақ және айран, ірімшік секілді өнімдер ешқандай химиялық қоспасыз дайындалады. Жас маман Дана Сисенбай Алматы технологиялық университетін сүт өнімдері технологиясы мамандығы бойынша тәмамдаған. Қазір ауылға оралып, технолог боп жұмыс істеп жүр.

Дана Сисенбай, цех технологы:

- Күнделікті сиырлар сауылады, айран ұйытылады, йогрут шығарылады. Ірмішіктер, тағы да басқа сүт өнімдері шығарылып отырады. Айранның төрт түрі өндіріледі. Нағыз айран, тан, йогурт түрлері. Ал негізінен ірімшек, майлықұрт, сүзбе сияқты өнімдері, қаймақтар шығарылады.

Сауылған сүт мына 5 қазандыққа жиналады. Кейін қаймақ пен сүті бөлініп, бөтелкелерге құйылады. Табиғи таза өнімге сұраныс жоғары. Тұтынушы сұранысына орай облыс орталығынан сауда нүктелері ашу жоспары бар. Әзірге цехта 10 ауыл тұрғыны тұрақты жұмыспен қамтылған. «Осындай кәсіпорындардың ашылуы ауылда жұмыссыздық мәселесін оң шешуге ықпал ете бастады», – дейді ауыл әкімі.

Абат Ақбалашұлы, Ойыл ауылдық округінің әкімі:

- Біздің округ бойынша 100-дің үстінде ресми тіркелген жұмыссыздар бар. Соның биыл 62-сін жұмысқа орналастырдық. Қоғамдық жұмыс, тұрақты жұмыс секілді.

Былтыр ауданда ауыл шаруашылығын әртараптандыруға бағытталған құны 1 млрд теңгеден асатын 80 жоба мемлекет қолдауымен қаржыландырылды. Биыл өңдеу өнеркәсібі бойынша 19 жоба қаралып жатыр. Оның басым бөлігі асылтұқымды мал алуға және өңдеу технологияларын өндіріске енгізуге арналған.

Зинеш Сарыбөпеева, Қызылқоға аудандық кәсіпкерлік және ауыл шаруашылығы бөлімінің басшысы:

- Бізде облыстық бюджет арқылы жылма-жыл бөлініп келе жатқан «Бизнес-аймақ» бағдарламасы бар. Бұл 7%-пен берілетін несие. Бұған жылда біздің кәсіпкерлеріміз қатысып келе жатыр. Осы 10 жылдың ішінде бізде 100-ге тарта жоба осылай қаржыландырылды.

Жалпы облыс бойынша алдағы 4 жылда ауыл шаруашылығында құны 27,5 млрд болатын 5 ірі инвестициялық жоба жүзеге асады. Оның ішінде ет-сүт өнімдері мен түрлі өсімдік шырынын шығаратын кәсіпорындар болады.

Авторлары: Арыстанбек Кенже, Айбек Байзақов, Жандос Рахметуллин